الجمعة، فبراير 25، 2011

وجه مشرق

لإننا واحد بجد .. لازم نفهم ده

بقولها لكل متعصب بيكره اخوه









علشان مش بس اكون بكتب عن السلبيات

مظهر جميل

والأجمل منه انه يكون من القلب





ياريت كل الناس بتفكر زى حضرتك يا شيخ اسامة


الخميس، فبراير 24، 2011

لازم نتصارح


كتبت هنا كتير عن حوادث قتل وظلم للمسيحين

وانتوا كتير رديتوا عليا

اللى اكتشفته بعد كل ده

اننا خايفين نتصارح

خايفين نواجه نفسنا بالحقيقة

بندور حواليها من برة

لكن مش بنقولها بصراحة

لازم نتصارح

لازم نعترف ان فى ناس فى مصر مش بتحب المسيحين


لازم نعترف ان فى ناس بتقتلهم وهى شايفة انها بتنفذ تعاليم دينها

اللى هيقولى انتى غلطانة يا فينوس

يبقى بيضحك على نفسه

كل الحوادث اللى كانت بتحصل

سواء للحكومة دخل فيها او لا

كانت بتحصل لمسيحين لان دول فى نظر البعض

كفار

حلال دمهم ومالهم وعرضهم

مهما حصل

ومهما عملنا ثورة

ومهما خرجنا المفسدين

فى افكار عايشة ومتغلغة جوة بعض الناس

فكر بيقول المسيحى ده كافر وانا لازم اكرهه


وافرح واهلل واقول الله اكبر لما يموت او يتقتل حد منهم


( الكلام ده بدليل عندى شوفته بعينى )

ارجوكم


انا كاتبة البوست ده ومش عاوزة ردود

لكن عاوزة لحظة كل واحد يقف مع نفسه


لحظة ضمير

لحظة صدق مع النفس وصراحة



الثلاثاء، فبراير 22، 2011

ابتـدينا ؟؟ !!









من اسبوع جواهرجى مسيحى اتقتل

لا اتدبح زى الخرووف


والنهاردة كاهن بيندبح بردو بنفس الطريقة

فى اسيوط !!


انا مش هعلق

لانى مش فاهمة

او جايز فاهمة وخايفة اصدق اللى فهماه

واكتبه


اقروا








الاثنين، فبراير 14، 2011

وردة بيضاء .. أضاءت الظلام



الوردة دى فيها شبه كبير بالى حصل فى مصر


او انا شيفاها كده معرفش


الوردة البيضاء دى هى الشباب الجميل البرىء اللى ضحى بدمه الطاهر

علشانى وعلشانك


علشان مصر كلها


وردة بيضاء نبتت فى ظلام

فى سواد وفساد


انا هتكلم عن نفسى واقول ان من اول ساعة فى السنة دى


شوفت حاجات وعاصرت احداث


صعبة اوى وقاسية


احداث خلت الشهر والنصف اللى فاتوا من اول السنة


مروا عليا كأنهم سنيين كتير


عندى امل فى بكرة


وبدعى ربنا ان مصر بكرة تبقى احسن


كلنا محتاجين ده

كلنا محتاجين


الهدوووء


والسلام



والحب


كل عيد حب وانتوا طيبين وبكل سلام وحب يا اهل مصر

يا طيبين

السبت، فبراير 05، 2011

هو احنا مين ؟ طب عاوزين ايه ؟


شعب كان ميت


او نايم


مسجون واسير


فجأة صحى


وخرج يطلب حقوقه


كسر حاجز الخوف لأول مرة من سنين


اتعلم يقول عاوز ايه واتعلم يكون صوته عالى


لحد هنا كويس اوى

لكن فى شىء مرعب ابتدى يحصل


اتقسمنا لنصفين كل نصف فيهم بيرمى الاتهامات على التانى


الناس اللى بتنادى اننا نحكم العقل ونهدى شوية ونحاول ندى فرصة للإصلاح ولو حصل يبقى خير وبركة محصلش نقدر تانى نطلع ونقدر تانى نقول لا


بيتقال عليهم فرافير او جبناء او عندهم خنوع او عملاء للنظام الفاسد



والناس اللى لسه مصممين على موقفهم وعلى وجودهم فى التحرير


بيتقال عليهم مسيسين وأغلبهم وراهم جهات داخلية او خارجية



طب يا ناس هو احنا مين ؟

هو احنا عاوزين ديمقراطية ولا عاوزين ايه ؟


ازاى عاوزين حاجة وهى مش جوانا

ليه مش متعلمين نسمع بعض؟


ليه بنرمى التهم على بعض ؟

ليه كل واحد مفترض ان هو بس اللى صح ؟


هى دى الديمقراطية اللى عاوزينها يا ناس ؟


كلنا خايفين على بلدنا وبنحبها

ياريت نعرف نحبها صح

وميتحولش حبنا ليها للقول اللى بيقول


ومن الحب ما قتل



مصــــــــر بتخســـــــــــر يا ناس


يالى بتحبوها خافوا عليها