الخميس، فبراير 24، 2011

لازم نتصارح


كتبت هنا كتير عن حوادث قتل وظلم للمسيحين

وانتوا كتير رديتوا عليا

اللى اكتشفته بعد كل ده

اننا خايفين نتصارح

خايفين نواجه نفسنا بالحقيقة

بندور حواليها من برة

لكن مش بنقولها بصراحة

لازم نتصارح

لازم نعترف ان فى ناس فى مصر مش بتحب المسيحين


لازم نعترف ان فى ناس بتقتلهم وهى شايفة انها بتنفذ تعاليم دينها

اللى هيقولى انتى غلطانة يا فينوس

يبقى بيضحك على نفسه

كل الحوادث اللى كانت بتحصل

سواء للحكومة دخل فيها او لا

كانت بتحصل لمسيحين لان دول فى نظر البعض

كفار

حلال دمهم ومالهم وعرضهم

مهما حصل

ومهما عملنا ثورة

ومهما خرجنا المفسدين

فى افكار عايشة ومتغلغة جوة بعض الناس

فكر بيقول المسيحى ده كافر وانا لازم اكرهه


وافرح واهلل واقول الله اكبر لما يموت او يتقتل حد منهم


( الكلام ده بدليل عندى شوفته بعينى )

ارجوكم


انا كاتبة البوست ده ومش عاوزة ردود

لكن عاوزة لحظة كل واحد يقف مع نفسه


لحظة ضمير

لحظة صدق مع النفس وصراحة



هناك 32 تعليقًا:

سواح في ملك الله- يقول...

بصي يافينوس
ماهو تعريف الاسلام
المسلم الحقيقي يؤمن بكل الانبياء
والديانات
بسم الله الرحمن الرحيم
آمن الرسول بما انزل اليه من ربه والمؤمنون كل آمن بالله وملائكته وكتبه ورسله لانفرق بين احد من رسله)
صدق الله العظيم
وهذا الكلام معناه
ان الايمان لايكتمل لو لم نؤمن بكل انبياء الله

Kontiki يقول...

بمنتهى الصراحة وانا مسلمة وختمت القران اكثر من مرة الدين الاسلامى فى ايات كثيرة تدعو للعنف وللحق هو عنف وارد من موقف ما و متعلق بسبب نزول هذه الايات فى وقتها ولانها ايات ( دين يعنى )لابد ان يكون مسلم بها ونؤمن بها بداهة ولان هناك ما يعرف بالتأويل و هناك ما يعرف بالتفسير نجد ان كثير من الايات تم تأويلها لتصبح قنابل موجهه فى وجه اى مخالف سواء مسلم او صاحب اى دين اخر .
الحد الفاصل لتصبح الايات آله للقتل او تصبح نور للهداية هو عقل المتلقى فكما توجد ايات تتسم " بالعنف " يوجد نقيضها الذى يدعو للرحمة و الحب و التآخى و الحرية .
عقل المتلقى هو الحد الفاصل الانسان هو المحك .. القتلة ايا كان دينهم فقدوا عقولهم و فقدوا دينهم و فقدوا انسانيتهم عموما . صديقتى لا تحزنى ادعى للشهداء بالرحمة وتاكدى انهم فى مكان افضل فى عالمنا تألمى ولكن لا تكرهى فالقتلة لا دين لهم .

Ms Venus يقول...

سواح

طب مين دول

انت عارف كويس انهم موجودين

واللى انا بقوله صح وبيحصل

قولى انت مين دول ومين مسئول عنهم

وواجبك انت كمسلم ايه معاهم ؟


انت مش موافق على تصرفاتهم ايوة انا عارفة

طب عملت ايه ؟

Ms Venus يقول...

كونتى


طب ودى مسئولية مين ؟


انا كمسيحية متضررة واهلى واخواتى بيموتوا قدامى كل يوم

احنا بقينا فى حالة حداد دائم

ومحدش حاسس بينا

الكل بيدخل يواسى ويقول دى فتنة

طب انا استفدت ايه ؟


مين اللى واجب عليه يصلح اللى بيحصل ده ؟

mrmr يقول...

نحن لا نطلب غير المعونه الهيه هو قادر ان يغير نفوس البشريه
فالـ "غير المستطاع عند الناس مستطاع عند الله" (مت 26:19)
وهو ايضا قال " فى الزمان سيكون لكم ضيق .. لكن ثقوا انا قد غلبت العالم "
انا بعزي قلبك لعل قلبى ايضا يتعزى

سواح في ملك الله- يقول...

بصي يافينوس
ان مش هؤكد ولا انفي تهمة عن حد
بس عايز اقوللك الي عايز يعمل
جريمة ميسيبش دليل وراه من
نوع هتافات
واعلمي اختي الفاضلة
ان المسلم من سلم الناس من لسانه
ويده***
وان من قتل نفسا بغير نفس فكانما
قتل الناس جميعا
وكل هذه مبادئ الاسلام
وعفوا هذه ليست دعوه لتحبي اوتكرهي دين
ولكن احببت ان اعلمك ان
هؤلاء لم يفعلوا هذه الجرائم بصفة
طائفيه
وفي خطبة الجمعة الماضية في التحرير
قال الشيخ القرضاوي
وهو محسوب علي تيار الاخوان
ان من قتلوا في سبيل الوطن مسيحيين
او مسلمين هم شهداء
وكان يفخر بابناء اوطاننا من الديانتين
وحتي انه قال ان الهنا واحد
مسيحيين ومسلمين

Ms Venus يقول...

سواح ده كلامك انت ماشى وكلام الناس اللى عندها وضمير

وشايفة ان اى انسان فى الدنيا له حق الحياه بأمان مهما كان دينه وفكره

لكن دول بردو مسلمين وبلاش تنكر ده

زى ما كونتى قالت دول افكارهم ليها شكل تانى

دور مين اللى يوجههم

دور مين اللى يوقفهم عند حدهم


دور مين اللى يوقف حمامات الدم دى

مين ؟؟

سواح في ملك الله- يقول...

بصي ياست الكل
عايزك تقري بوست
نوارة نجم بتاع النهاردة
طبعا انتي عارفة مدونتها
وهتفهمي فيه ايه

سواح في ملك الله- يقول...

http://tahyyes.blogspot.com/2011/02/blog-post_24.html
خدي الرابط ده

شهر زاد يقول...

حبيبتي فينوس الكلمة
لن أزود على ما قاله سواح وكونتيكي
لانها الحقيقة
وما يهمكش من رجال الدين بتوع النهاردة بص للكتب السماوية بتقول ايه
مش الانجيل من عند الله والقرأن من عنده سبحانه
مش الانجيل بيدعو للتسامح والمحبة والتعايش يعني يجي ربنا وغير دا في القرأن
ما الدين واحد يا حبيبتي وأسس واحدة
احنا بنأمن بسيدنا موسى وعيسى عليهما السلام وبنأمن برسالتهم السماوية
وأمنا مريم العذراء هي رمز الطهارة والعفة في دينا وعندنا سورة في القرأن الكريم كلها بتتناول قصة امنا العذراء بأدق تفاصيلها وسميت باسمها
بس مش حقولك ان كل المسيحين بيطبقوا الدين ولا كل المسلمين بيطبقوا الشريعة
هناك اوفر في كلو
بمعنى في ناس فهمه الدين غلط او بتفهموا بطريقتها
نبينا محمد عليه أفضل الصلاة والسلام كا ن صاحب اليهودي والنصراني على السوااء مادام الواحد لايضر بدين التاني
يعني هناك استثناءات وهذه الاخيرة لاتبنى عليها القاعدة
عامل تاني مهم الفتن كثيرة واقوى مؤثرا لها هو الدين
فالناس الي بتهدف ليها بتستغل اختلاف الدين اسوء استغلال علشان دا اقرب طريق لاشعالها
والاسلام بيحرم الفتنة وبينهي عليها
الموج عالي يا فنوس قدام المنكر مش لقين الا الي قالو ربنا تغيير المنكر باليد او اللسان او القلب وهذا اضعف الايمان
احنا منملكش غير قلمنا وقلوبنا علشان نسعى لتغيير المنكر دا
ممكن تعتبريه ضعف لا مبلاة استسلام بس دي الحقيقة
مش حكذب عليك وقلك انا حقتل الى يقتل اي انسان مهما كان دينو لا
بس حكتب ان دا حرام ومش لازم يتعمل حدعو ربي في الصلاتي يبعد الفتن ويصلح الحال
وزي ما قلت لك الموج عالى ولازم نبقى ايد واحدة ننجرح اه ننطعن اه بس نعتصم بحبل واحد هو حبل الله
مش انت وانا بنؤمن به
يبقى خلاص
هو الي لينا مالناش باب غير بابو
وغير كدا بنكون بنساهم في الفتنة ونكون بنشارك اعداء الله في توطيدها
فينوس وحشتني كتاباتك انا عارفه انك مجروحه ومقهورة وعارفه انك تايهة وفي راسك مية سؤال
بس متكونش قلم يستغلوه اعداء الدين
فينوس والله بحبك لوجه الله تعالى وبنقهر لما بقرا كلماتك وربنا يعلم قد ايه بتعذب من الحال دا
حقيقي اني مش مصرية
حقيقي يمكن تغيب علي حقائق كثيرة
بس لي قلب حب مصر وناس مصر وانفتح عليهم وعاش معاهم مدة وعرف عاداتهم وتقاليده
انتم شعب عظيم واصيل ولو تأثير علشان كده انتم مستهدفين اكثر من اي شعب تاني
انا بعتذر على التطويل بس بتمنى انك تقرئي كلامي بقلبك وباحساس اخت لاختها اعتبريه رسالة خاصةة جدا
واخيرا يارب يصلح الحال
يارب يطفي نار الفتن
ويعمي عيون المخربين على ارضك وعرضك يا مصر الطيبة
تحياتي

طالبة مقهورة ..درجة أولى يقول...

فينوس انا عاوزة ارغي حبة

انا بطبعي حد منطوي
أول صديقتين ليا في حياتي كانوا مسيحيين
معرفتش الفرق بين الكلمة ديه غير لما كبرت في ابتدائي
لأني مكنتش فاهمة يعني ايه اختلاف اديان ف البيئة اللي اتربيت فيها وده مش معناه اني عقلي مستوعبهاش..بس عشان محستش فعلا بفرق بين صحابي مسلمين او مسيحيين بالعكس

احنا اتربينا على مبدأ
العالم بينقسم اتنين ناس طيبة وناس شريرة
مش مهم الطوائف
فيه ناس متشددين ضد المسيحيين لا ننكر ده
وفيه ناس متشددين ضد المسلمين وده في جميع انحاء العالم بس يمكن مبيبنش في الدول العربية

الفكرة كلها فكرة توعية
اننا نشيل من جوانا فكرة انا بعامل مين..ونحط فكرة واحدة احنا بنعامل ربنا مش بشر

يمكن في مصر علاقة المسلمين بالمسيحين متوطده..عشان كده اي حاجة بتوقع بتكون بين الطوائف عشان ينتشر الكره والحروب النفسية
بس ده مش ينفع نسيبه ينجح

زي ما اتربيت مبميزش انا بتعامل مع مين..عمري ما هبص مثلا على واحد استشهد واقول ده مسيحي او مسلم بس هقول شهيد عشان خاطر الحق

مدونة رحلة حياه يقول...

السلام عليكم
تصدقى عندك حق لازم نتصارح
والمخطأ يتحاسب سواء من هنا او من هنا
عشان الاسلام ما أمرش بكدا لمن عرف الاسلام
وكذلك المسيحية وكذلك اليهودية ايضا
بس نتصارح ونتحاسب والمخطئ يحاسب مهما كان وممن كان
شكرا فينوس

Days and Nights يقول...

الأخت الغالية والعزيزة / فينوس

مشكلة التعصب الدينى قائمة منذ قديم الأزل ... من يوم حاول اليهود قتل سيدنا عيسى أو السيد المسيح يسوع عليه السلام... ومن الحملة الصليية على القدس ... ومن التطهير العرقى فى البوسنه والهرسك ... وفلسطين ... والعراق ... وأفغانستان ... كلها صراع دينى ... حتى بين طوائف الدين الواحد ... وكره بعضهم البعض ... ومحاولة إثبات المتحاور للآخر عن صحة دينه أو مذهبة ...ولن يزول إلا عندما ينزل السيد المسيح علية السلام مرة أخرى من السماء فى آخر الزمان ليشيع المحبة بين الناس ويقتل المسيخ الدجال زعيم أو ملك اليهود ويبين للناس مسلمين ومسيحيين ما أختلفوا فيه.

المشكلة عندى أن هذا الصراح بين أصحاب الديانات السماوية الثلاث ... فاليهودى يكرة العربى ويستبيحة ... وهذة تعاليم التوراة ... والمسلم يعادى اليهودى ... واليهودى لا يعترف بالمسيحى ... والمسيحى لا يعترف بالمسلم ... ولكن يوجد تآخى بين المسيحى والمسلم ... وكره من كليهما لليهودى وهذا ما إتفقا علية ... لماذا هذا الصراع الدائم ؟؟؟ مع أن المفترض أن يكون الصراع الأكبر بين اللادينى وأصحاب الأديان... خصوصا بأن من يؤمنون بالله هم فقط ثلث العالم.

معظم أصدقائى مسيحيين وما أحاول فعلة هو ترسيخ فكر المحبة بين هاتين الديانتين فى الأبناء ومن هنا تعود الفائدة عن طريق إنشاء جيل متحاب فيما بينه بعيد كل البعد عن الضغينه... هذا ما أحاول فعله .

ولكنك أختاه لن تستطيعى فى الوقت الحاضر أن تغيرى فكر المتشدد ... فهذا هو أمتداد الفكر المستورد من الخارج من منتصف السبعينات إلى الآن ... والذى وجد له مرتع فى بلدنا الحبيبة .

الحق أقول لكى أختى الحبيبة أن أخوتى الأقباط يضربون جليل المثل فى البعد عن الفتنة عن طريق طيبتهم وسلوكهم فى التعامل مع مثل هذه الحوادث والذى ينبع أيضا من تعاليم الدين المسيحى ... فالطيبة والسلم والمحبة هى النبع والأساس.

ليس لنا سوى الدعاء والتضرع إلى الله لهداية أمثال هؤلاء البشر مدعاة الفتنة...والمهم أن لا تأخذنا مثل هذه الحوادث مفتعلة كانت أو حقيقية إلى كره بعضنا البعض ... دعونا نتمسك ببعض ... نضع إيدينا فى أيدى بعض ... نواجه ذلك الوجة القبيح ونقول له مهما حاولت التفريق بيننا لن تستطيع ... لنكون مستقبليا نسيج واحد ... ونحاول من الآن تربية النشىء الجديد على المحبة ... على إحترام كل الأديان ... والصبر مفتاح الفرج... هذا ما أطمح إليه ...وترينه بعيدا وآراه قريبا قابل للحدوث فى أقرب وقت إن شاء الله ... وليباركنا الرب جميعا... آسف على الأطاله ودمتى بكل الحب .

mony يقول...

كل مره تحصل فيها جريمه بكون نفسى اكون بحلم
بس للاسف الظاهر هى بدايه النهايه
..ربنا موجود ..

Boneta يقول...

سواح في ملك الله
القرضاوي سوري شخص منافق ده بيصطاد في الميه العكره لانه عارف ان المسيحيين مش طايقين يشوفوا وشه وانا اولهم واللي يقولك غير كده يبقي كداب والمسلمين فيهم ناس كتير مش بيطيقوه وادخل علي اليوم السابع وشوف تعليقات المسلمين المحترمين ضد فتوي اهدار دم القذافي
فشخص زي ده كلامه مش حجه عليه
المتشددين والجهاديين دول مسئوليه حضرتك وكل مسلم صاحب ضمير
انا ايه اللي يخليني استحمل قرفهم وعقلياتهم المريضه طالما اني مش السبب فيها؟
اعتبر نفسك لا سمح الله مسيحي وقولنا رايك ايه في براءه كل المسلمين في حوادث قتل الاقباط!! واخرهم مجرمين نجع حمادي
بناء علي ايه بياخدوا براءه ؟
محتاجين حد يفسرلنا اللي بيحصل في البلد دي لاننا تعبنا .

carmen يقول...

لكم دينكم ولي دين
وتأكدي يافنوس ان كل واحد اخطأ هياخد جزاءه ربنا سبحانه وتعالي مابيسبش حق حد واي حاجة بتحصلنا فهي اكيد اكتر حاجة فيها خير لينا
وردة لعيونك ارق فينوس في الدنيا

هبة فاروق يقول...

لا تحزنى يا فينوس فالكل فى مركب واحدة
وامبارح قتل سواق ميكوباس على يد ظابط فى منطقة المعادى يعنى البلد فى حالة من عدم التوازن والفوضى ولا نعرف من المتسبب فى خلق نوع من الفتنة والحرب النفسية

Ms Venus يقول...

شهرزاد


الناس اللى فاهمة غلط دى بتموت وبتقتل


ما ه لو فاهمة غلط وفى حالها مكنتش انا هتكلم

لكن فى دم

وانا غصب عنى لازم اصرخ

عارفة وفاهمة كويس ان اللى بيحصل فى جزء منه سياسى


لكن بردو مش هدفن راسى فى الرمل وانفى ان فى ناس ده فكرهم وبعيد عن السياسة


صدقينى انا تعبت

تعبت وانتى بتطلبى منى ارجع اكتب

طب ازاى ؟ انا نفسى لكن مش قادرة

كل ما احاول انسى وابص لبكرة

مش بلحق

Ms Venus يقول...

طالبة


يا حبيبتى ده كلامك وكلامى وكلام الناس اللى عندها عقل وضمير

لكن مش الكل كده فى مصر

انتى قولتى المشكلة فى التوعية


طب مين اللى مسئول عن التوعية دى


هل انا اللى مسئولة ؟


ولا انتى ؟


ولا ميين


مين يقدر يغير فكر الناس دى

Ms Venus يقول...

مدونة رحلة الحياه


ده اللى انا وكلنا عاوزينه ونفسنا فيه


انا بكلامى ده مش بقول ان المسيحين ملايكة

لا طبعا فيهم السىء وفيهم الكويس

والعكس

لكن فين العدل


ازاى انا اهلى يتقتلوا من ناس ليهم فكر معين

والناس دى لا تعاقب

بدعوة انهم متشددين فى الدين !

Ms Venus يقول...

Days and Nights


المظلوم لما يصرخ ده حقه


انا هنا بصرخ وبحاول اوضح شىء حقيقى موجود


انت بتحاول بعقلك وضميرك تهدم اى فرقة بين ابناء وطن وارض واحدة

وقبل الوطن كمان كلنا اخوات فى الانسانية


بس مش هننكر ان فى ناس بتهد الجسر ده

وده واجب كل انسان عنده ضمير

انه يقف قدامهم ويقولهم لا

الدم لا


اختلف معايا زى ما تحب

عارضنى وعارض فكرى زى ما تحب

لكن تقتلنى لا لا لا


ده كلام جوايا وجواك وجوة كل انسان عنده ضمير

Ms Venus يقول...

كارمن


الجرح مؤلم يا كارمن

والاصعب منه الظلم

والاصعب اكتر كمان انك تحسى انك مظلومة ومحدش حاسس بيكى


بس صدقينى كلنا بنقول ياارب

Ms Venus يقول...

هبة


انا عارفة كويس اوى ان كل اللى عملناه والثورة والاطاحة بالنظام والفاسدين فيه دى خطوة اولى


وان اللى جاى فعلا صعب اوى اوى واهم واخطر


ربنا يرحمنا كلنا

Ms Venus يقول...

مونى


مرمر


طبعا عارفة وحاسة بيكم


واللى حاسس اكتر بينا هو ربنا

Ms Venus يقول...

سواح انا قريت البوست اللى انت سيبت اللينك بتاعه


وكلام نوارة صح طبعا

لكن تعالى فكر كده معايا

فى النهاية والنتيجة مين بس اللى بيموت ؟

ليه دايما افتعال الحوادث الطائفية بيكون بس ضد المسيحين

وعاوزة كمان اجابة على سؤال بونيتا

اهو احنا بعد الثورة

ليه اتحكم بالبراءة على شركاء الكمونى اللى عمل مذبحة نجع حمادى ؟

ما كل دى اسئلة جوانا بتتعبنا ومحتاجين اجابة ليها

Tears يقول...

ده تعليقى....اسمعيه للاخر...ده ما يدور داخل احد اهم المساجد و بحضور حشد كبير

http://www.youtube.com/watch?v=wXt_V386Tnw&sns=em

سواح في ملك الله- يقول...

بصي يافينوس
النظام المصري البائد يعتقد ان الشئ الوحيد
اللي يؤلب الغرب علي مصر
بعد ان ابدي الغرب اعجابه بشعب مصر
وانبهارة بتحضر شعبنا
هو اللعب علي ورقة المسيحيين الاخيرة
في مصر من اجل اثبات ان الاخوان
هيستولوا علي الحكم
وانتي ادري واعلم مني ان الاخوان لاعلاقة
لهم بالعنف
وان الاخوان ليسوا بالضخامة التي صورها
النظام المنقضي للغرب
والا لو هما بالضخامة دي كانوا
قاموا بالثورة لوحدهم
ولكنها الورقة الاخيرة الذي يلعبون عليها
حتي يؤلبوا الغرب علي الثورة
وعلي فكرة انا غير منتمي لاي تيار
ديني ولاسياسي
ولا احب الدخول في دهاليز السياسة
ولكني قارئ جيد لما يحدث فيها

Ms Venus يقول...

جميل يا تيرز وسمعته

شوفى انتى بقى التعليقات اللى تحته


هو ده اللى انا بتكلم عنه


الناس يا تيرز

شوفى التعليقات هتحزنى

Ms Venus يقول...

سواح


شوف الفيديو اللى تيرز حطاه ده

وشوف تعليقات الناس

هتفهمنى كويس

سواح في ملك الله- يقول...

عندك حق يافينوس
فيه متشددين ولا انكرهم
بس هل هؤلاءيعملون بالاسلام؟؟؟
الاسلام براء من هذا الكلام
بس الاغلبية العظمي من المسلمين
لايوافقون عي هذا الكلام
بس برضه عايز اقوللك

ان الكافر في تعريف الاسلام
هو من ينكر او لايعترف وجود الله تعالي
او عابدو الاصنام من دون الله
وان لهذا الكون خالق
والاسلام والمسيحية واليهودية
هم ديانات من عند الله
لااحد يستطيع ان ينكرهم
اذا من يخرج عن هذا الكلام
فهو اثم ولا يعرف دينه
والتساؤل هنا
لماذا لم نري الفتن الطائفية
الا في العقود الاخيرة
وفي الدين الواحد
نري المذاهب تتقاتل كالسنه والشيعة في لبنان
والعراق
والاختلاف ايضا في المذاهب المسيحية
والايقاع بينها كالكثوليك والارثوزكس
وابروتستانت
هناك اهداف سياسية من التلاعب بالمشاعر
عي هذا النحو
لانه فرق تسد
وستثبت لكي الايام صدق مااقول

Ms Venus يقول...

اهو هما دول يا سواح اللى انا بقصدهم


وانا عارفة انك كده فهمتنى كويس


وعلى فكرة انا مش ضد الاختلاف بالعكس

عادى انت تختلف معايا وانا اختلف مع تيرز

عادى جدا لكن بنحترم بعض

ونحترم آدمية بعض

وحق كل واحد فينا فى الحياه بأمان

لكن دول لا

دول بيحللوا الدم

وهنا بقى الوقفة

Boneta يقول...

التعليق ده مش للنشر يا فينوس
انا مش زعلانه ولا حاجه يا حبيبتي
اللي حصل ان بعد تعليقي علي البوست عندك فوجئت ب لولا وزهراء باعته لي تعليق شبه تهزييء
يعني عامله كوبي بست لاجزاء من تعليقي عندك وبتقولي ده مش اسلوب ناس محترمه وفينوس ورامي ومرمر عمرهم ما اتعاملوا معانا بطريقه مش كويسه او اتكلموا باسلوبك ده معانا
وكمان معترضه علي اني قلت علي حسان والقرضاوي ارهابيين
وبتقولي انتي كاتبه القرداوي وهو اسمه قرضاوي وانا قولت اكيد انتي غلطتي في الكتابه ومش قصدك تكتبيها كده لانك هاتبقي قاصده تشبهيه بحيوان معين وده مش اسلوب الناس المحترمين
وكمان قالتلي ان حسان مش ارهابي ومايصحش تقولي عليه كده لان مايصحش اقول انا كمان علي قسيس ارهابي . وكمان قالتلي ممكن تقوليلي انتي ايه مشكلتك في الماده التانيه؟
وانا رديت عليها عندي اكتر من مره وقلتلها اني هادخل الغي تعليقي اللي عند فينوس وفعلا لغيته وكتبت اعتذار للكل علشان مش يكون سبب اي احراج ليكي او لمرمر ورامي وياريت
تدخلي تقري التعليقات ما بيني وبينهاوانتي تشوفي الحوار كله
المهم يا فينوس انا عاوزه اتواصل معاكي بعيد عن هنا
يعني لو ممكن تبعتي لي الايميل بتاعك وانا ابقي اتكلم معاكي عليه هايكون احسن كتير من كلامنا كده .
سلام وربنا معاكي .