الجمعة، مايو 13، 2011

يعنى ايه يا انسان ؟




يعنى ايه تكون انسان ومتحسش بغيرك ؟

يعنى ايه تعيش ظالم ومعاند ضميرك ؟

يعنى ايه تشوف الحق وتغمض عنه عينك ؟


يعنى ايه تفرح وتضحك على جرح غيرك ؟


يعنى ايه تعيش انانى ؟


تقول انا ومحدش تانى ؟


يعنى ايه تفكر ان انت بس اللى صح


يعنى ايه تلاقى الف عذر لأى جرح ؟

يعنى ايه تقول ان الغلط هو اللى صح؟



لا استنى هنا واسمعها بقى منى


انت انسان وانا زيك كمان انسان



عايش فى امان وانا كمان عاوز الامان

انا مش اقل منك

انا مش اضعف منك

انا بس ساكت وصابر ومتحمل الأذية

علشان بحبك

و

لانك فى النهاية

اخويا فى الانسانية


ع الهامش

كانوا بيقولوا لينا الساكت عن الحق شيطان اخرس

دلوقتى الشيطان بقى احول

بيشوف الحق بشكل تانى خالص


هناك 14 تعليقًا:

Tamer Nabil Moussa يقول...

ازيك فينوس

باين ان اختفاء المواضيع مش عندى بس لكنها ظاهرة على الجميع نتيجة اصلاح الموقع


انا كنت بقول

ان الانسانية احساس

اذا ذهب الاحساس ذهبت الانسانية


موضوع قيم

وعرض طيب

مع خالص تحياتى

Carmen يقول...

يعني مايبقاش انسان ياحبيبتي اذا كان كل ده فيه

د/دودى يقول...

الانسان اللى عايز يعيش لوحده ياجر له جزيره فى المحيط و يريحنا منه ...اللى عايز يعيش بينا -حتى لو كان مش حابب اللى حواليه- على الاقل يرحمنا من اذاه...

الرسول عليه الصلاه و السلام بيقول "المسلم من سلم الناس من يده و لسانه"

همس القلب يقول...

فى ناس بتخاف تتكلم حتى لو الحق معاها
اتعودا على انهم يمشوا جمب الحيط ويقولو حاضر ونعم وبس
تحياتى ليكى

Boneta يقول...

بوست جميل يا فينوس
سامحيني مش عارفه اعلق عليه
انتي قولتي كل حاجه
تحياتي

لاسع افندى يقول...

يعنى ربنا موجود

iـــــــــــsــــــــــlــــــــــــaـــــــــm يقول...

والله كلامك هايل يا فينوس
وبالنسبه للشيطان اللى بقى احول
فانتى مغلطتيش خالص
لسه كلامك فيه انسانيه
والعالم بينسى
تحياتى ليكى

mrmr يقول...

ياريت الكل يعرف يعنى ايه انسانيه
كان الكل يرتاح
لكن احنا عايشين فى غابه قانونها البقاء للاقوى لكن مش عارفين ان ربنا اقوى بكتير من قوتهم

ربنا موجود

(حلـم) يقول...

متحمل الاذية



علشان



بحبك


تستاهلي ابوس ايدك


اسرتيني بانسانيتك


الله يحماكي

يا ميس فينس

Shaimaa يقول...

أنا تعبانة وخايفة جدا جدا على مصر

معنتش عايزة أشوف أخبار خالص ..معنتش عارفة ايه اللى بيحصل

خالص حبى

miroooo يقول...

فعلا يا فينوس فى ناس اتنزعت من قلوبهم الرحمه والانسانيه انعدمت عندهم
دول بقى بعيد عنك بيبقوا مغيبين خالص وضميرهم نايم
ربنا يبعدنا عنهم ويصلح احوالهم
تحياتى لاسلوبك الرائع

Desert cat يقول...

الىل بيحرقوكوا ويدمروا فيكو دول مش بشر يا فينوس ولا يعرفوا للانسانية معنى دول لو حيوانات كانوا حسوا يعنى ايه قتل انسان ويعنى ايه بث الرعب فى قلبه ويعنى ايه هدم دار عبادة او حرقها
لكنهم حتى مش قادرين يملكو احساس الحيوان
ربنا يهونها

لـــولا وزهـــراء يقول...

ربنا يحفظ مصر
لولا

re7ab.sale7 يقول...

صباح الورد برغم كل شيء
شوفي ...كنت بقول لصديقي انا مكنتش عايزة ابقي انسانة ..ياريتني كنت بقيت شجرة او وردة او اي شيء تاني ...عشان بس تصرفات البني آدمين...
بس الحمد لله علي كل شيء ومش اعتراض علي مشيئة الله لكن اعتراض علي تصرفات البشر
بس هما كدة البشر " خلق الانسان جهولا"