السبت، مارس 12، 2011

حقهم ولا مش حقهم ؟+ قانون ولا جلسات عرفية ؟





كنت ساكتة وقولت ابعد كده شوية واهدى

لكن بصراحة بقيت اقراء واسمع حاجات مستفزة لابعد حد


خليتنى مش قادرة اسكت


ملاحظة ان الكل عمال يصرخ وينادى

بلاش طلبات فئوية

الوقت مش مناسب

الحال صعب

وطبعا بيقصدوا الناس اللى عند ماسبيرو


طلبات فئوية ايه ؟


اولا الناس دى مش فئة من الشعب علشان يتقال عليهم طلبات فئوية

الناس دى مصريين ومش ليهم طلبات

لا دول ليهم حقوق


تعالوا نرجع من الاول


الكنيسة اتهدت على ايد شوية بلطجية ومجرمين


الناس اتهجرت من بيوتها


طب الناس اللى فى ماسبيرو دول عاوزين ايه ؟ ما الجيش وعدهم خلاص ؟


اقولكم


عاوزين القبض على المجرمين دول واللى هما معروفين

وخدوا بالكم من كلمة معروفين دى


معروفين صوت وصورة وكل حاجة



تانى حاجة بقى خطوات فعلية فى البناء

مش كلام وخلاص


ايه بقى المشكلة فى الطلبات دى يا ناس يا عاقلين ؟


حقهم ولا مش حقهم ؟


انا طبعا مش هتكلم عن المهزلة اللى حصلت

والكلام الفارغ والتافه والغبى اللى اتقال ان الكنيسة بتعمل سحر وكلام حتى الطفل يضحك بسخرية لما يسمعه

( اصل حجة الاسلحة راحت بقى دلوقتى حجة السحر )


ومش هتكلم كمان على يا حرام القيادات ( الدينية )



اللى راحت تطبطب على البلطجية الى هناك وتقولهم معلش معلش خلوا الناس تبنى كنيستهم ويرجعوا بيوتهم

لا ومش بس كده لا و آمروا الجيش انه ولا يبنى طوبة فى الكنيسة غير لما يحايل المجرمين


هههههههه بياخدوا رأى البلطجية وبيحايلوهم

بدل ما يقبضوا عليهم



( وهو المفروض مين اللى ماسك البلد وبينفذ القانون ؟

القيادات الدينية ؟

وازاى اصلا هما اللى يدوا الأوامر للجيش امتى وازاى ينفذ القانون ؟

هى مصر رايحة لفين ؟)






مش هتكلم اكتر من كده


لانى لو زودت هقول كلام يزعل



بس الحساب هيجى على كل انسان تطاول وتبجح


هناك 37 تعليقًا:

سواح في ملك اللــــــــــــــــــه- يقول...

, ومين اللي قاللك ان مطالب
اخواننا المسيحيين فئوية
دي مطالبنا كلنا
وكلنا كنا ساخطين علي هدم الكنيسة
وانا معاكي حجة السحر مش مقنعة

ومين الي قاللك ان النائب العام مش
بيحقق
علي فكرة فيه تحقيق وكل اللي اشترك
في المهزلة دي لازم يتحاسب
وكلنا بنطالب بكدة

Ms Venus يقول...

عارفة يا سواح

ان العاقلين كتير واللى عندهم ضمير كتير

واللى مش راضيين بالمهزلة دى كتير


وصوتنا كلنا دلوقتى لازم يوصل

ومحدش هسكت

Tears يقول...

بشكل عام الثورة قامت لتنظيف البلد و همه اخدوا شرعيتهم من الثورة و قالوا انهم بيحموا مطالبها بس انا بدات ارى انهم بيلتفوا عليها و فيه تباطىء يظهر تواطىء

نفس اللى بتقوليه مكرر على مستويات عده...زكريا و صفوت و سرور و جيمى فيه قضايا ضدهم بالهبل و رغم كده لا يقبض عليهم و همه بيحركوا امن الدولة و البلطجية و بيحموهم و اللى عاملين قيادات دينية و اولهم حسان ده اكبر مؤيد لمبارك و كان بيقول اللى امن الدولة عايزاه بس بذكاء و هو اول من هاجم مظاهرات يوم 25 و بعدين ركب

البلد لسه ما نضفتش و مش فى ايد امينة انما فى ايد مضغوط عليها

Ms Venus يقول...

ايوة يا تيرز


فى خطر وواضح جدا

لاحظى دلوقتى مين اللى ظاهر على الساحة

لو مش اخدنا بالنا كويس اوى ووقفنا كلنا


هتحصل كوارث

وكل اللى اتعمل هيضيع

مش نقول اسكتوا ومش وقت مطالب فئوية ال

Tarkieb يقول...

حقهم طبعا وحق روقة كمان...يا ستي امن الدولة والوطني لسة ما راحشي والثورة لسة مانضفتشي البلد..انت نسيتي الكنيسة اللي اتضربت في سيناء ومحدش اخد باله؟ ودورو على مكان سهل الناس فيه تسار بكلمة....صدقيني التحام المسلميين بالمسيحيين في الثورة حاجة حقيقية ومش تمثيل وده اللي احنا بنعيشه من زمان بس كان في ايد خفية بتعكر الصفو...وبعدين انت تفتكري ان ربنا يعني ح يتقبل صلاة واحد هدم دار عبادة؟ هدي اعصابك وان شاء الله حتروق وتحلى وكل المجرميين حيتعاقبو بس هو الجيش بس اللي مركب على قلبه مراوح وبطئ اوووووي....

Ms Venus يقول...

تركيب

لا انا طبعا عارفة وفاكرة الكنيسة اللى انضربت فى رفح وقت الثروة


ومش دى مشكلتى دلوقتى


انت اخدت بالك من اخر كلمتين ليا ؟

شايف مين اللى على الساحة ؟


واخد بالك من المعنى ؟


الناس اللى واقفة فى ماسبيرو دى

بتحافظ على مصر لا تتحول لطريق تااااااانى خالص


واضح جدا انها داخلة عليه والمشكة دى فجرته

وعلشان كده لازم كلنا نبقى معاهم

مش نهاجمهم

فاروق سحير ( فاروق بن النيل ) يقول...

فينوس....
كنت ومازلت معترض على أن نبعد وأن تبعدى ونكون سلبيين أنا لسة منزل على اليوتيوب الفيديو ومعاه القصيدة ولو دققتى شوية بالكلام والشعر والصور وربطيها ببعض حاتعرفى إننا لو سكتنا عن البلطجية دية يبقى علينا وعلى مصر كلها السلام وإوعى تقولى تانى كنيسة
لاتهمنا هيه بالضبط عندنا زى هدم جامع والله لو كنت هناك كنت قتلتهم حتى لو حاموت بإيديهم لأنى طول عمرى باكره الظلم والتعدى والبلطجة ..........
الرابط: http:\\www.youtube.com/farouksam/كنيسة أطفيح وقصيدة " حبيبتى " للشاعر فاروق سحير ( فاروق بن النيل )
وممكن تشوفيها على البوست بمدونتى مباشرة فيها فيديوهان وشكرا لكى فينوس

Ms Venus يقول...

استاذ فاروق

بالظبط حضرتك قولت المفيد

اننا لو سكتنا والموضوع عدى

يبقى علينا وعلى مصر السلام


لان اللى شايفينه دلوقتى انذار لشىء خطير جدا


مش لازم ابدا ابدا نسكت عليه

كنيسة جامع معبد

كله واحد

المشكلة والخطورة فى الدلالات

Ms Venus يقول...

تركيب

استاذ فاروق

اقروا رد تيرز هتفهموا قصدى كويس

Ms Venus يقول...

فيه تباطىء يظهر تواطىء

البلد لسه ما نضفتش و مش فى ايد امينة انما فى ايد مضغوط عليها

سندباد يقول...

معنديش كلام اقوله لان كلامك صح
ولازم يكون في خطوات جادة لاعادة الثقة والامان جوانا
وربنا عنده العفو

Ms Venus يقول...

ايوة يا سندباد


لااااازم خطوات جادة

لــــ زهــــــراء ــــولا يقول...

اختي الجميلة فينوس ... الكنيسة هتتبني بكرة ان شاء الله الجيش حدد توقيت زمني لبدء البناء... ومش هعرف اقول احسن من اللي قاله اخويا الكبير تركيب
"

الوطني لسة ما راحشي والثورة لسة مانضفتشي البلد..انت نسيتي الكنيسة اللي اتضربت في سيناء ومحدش اخد باله؟ ودورو على مكان سهل الناس فيه تسار بكلمة....صدقيني التحام المسلميين بالمسيحيين في الثورة حاجة حقيقية ومش تمثيل وده اللي احنا بنعيشه من زمان بس كان في ايد خفية بتعكر الصفو..."
لولا

غير معرف يقول...

قبل التعقيب دا رائ الخاص المتواضع
ولا اقصد به ولا من خلاله الاساءة الى اى أحد لان حاليا بقى من السهل على الجميع ان يتهم الاخر بالخيانة والعمالة
............
اولا:
حديث قدسي عن رب العزة سبحانه:-
" أنا الله لا إله إلا أنا مالك المُـلك ومـَـلك الملوك قلوب الملوك في يدي وان العباد إذا أطاعوني حولت قلوب ملوكهم عليهم بالرأفة والرحمة وأن العباد إذا عصوني حولت قلوبهم عليهم بالسخط والنقمة فساموهم سوء العذاب فلا تشغلوا أنفسكم بالدعاءعلي الملوك ولكن اشغلوا أنفسكم بالذكر والتقرب أكفكم ملوككم " رواه الطبراني

ثانيا:
اختى الكريمة اذا استمعتى الى ما حدث فى القرية او الى المؤتمر الذى عقد هناك بحضور اهل الايمان وائمة المسلمين لوعيتى ما يدوار فلا ننكر على ذى حقا حقة ولكن لم يحدث من اهل القرية ما قيل من طرد لاهل الذمة والله على ما اقول شهيد ...

ثالثا:
ما يحبطنى فى كل ما اره من المتابعين والمعقبين الالتزام باتجاه معين وهو ام معارض او مؤيد ويغفل حق الاخرين وكأن النظارة التى ارتداها لا ترى الا من خلال عين واحدة وتجاهلواالعين الاخرى

رابعا:
اختى العزيزة ما يؤلمنى اننا اصبحنا كما اطلق علينا الغرب القطيع
نستمع لننطلق بمعنى اخر وبالادق اننا شعب تلفزيون وبنعتمد على الصادر من الاعلام وخاصة الذى نعتقدها معارض وهيجبلنا حقنا من النظام البائد وبالتالى بنستمع اليه وكانه كتاب سماوى مقدس ونملئ عقولنا بما ارادو دونما النظر الى بواطنهم او حقيقة ما نضخوا به

خامسا:
ودا راى خاص جدا انى مبقاتش متفائل ويمكن بقيت محبط اكثر من الاول وبكتير

خالص تحياتى
يوميات حارة

Ms Venus يقول...

لولا


حبيبتى هقولك نفس ردى على تركيب

المشكلة اخطر من كده كتير

واللى باين كده اننا رايحين لطريق تانى خالص

غير اللى الشرفاء فى التحرير وقفوا علشانه


بردو راجعى رد تيرز هتفهمينى اكتر

Ms Venus يقول...

غير معروف

اولا اهلا بيك وكنت اتمنى تدخل بأسم معروف علشان اعرف اتناقش مع حضرتك

فى كلامك حضرتك قولت كارثة من غير ما تاخد بالك

قولت لى اتعمل جلسة عرفية ورجال دين هما اللى بيتحايلوا على اهل القرية علشان الكنيسة تتبنى !!!!


بالله عليييييييييك


هو بقى القانون بينفذه رجال الدين ؟؟


ده علشان ايه ان شاء الله ؟


رجل الدين مكانه المسجد او الكنيسة فقط

فقط


فقط

لكن تنفيذ القانون واجب الحكومة والقضاء


ثانيا

ازاى يعنى ياخدوا الاذن من المعترضين علشان الناس تاخد حقوقها ؟؟


محدش ابداااا هيقبل ده

ابدا


والناس اللى دمها راح فى التحرير

مش دفعوا دمهم علشان يحكمنا راجل دين


مصر دولة مدنية وفيها سيادة قانون

مش جلسات عرفية

سواح في ملك اللــــــــــــــــــه- يقول...

فينوس عندي ملحوظة
ارجوا ان يتسع صدرك لها
وجود رجال الدين انا شايفة ايجابي برضه
طبعا مش لازم هما اللي يطبقوا القوانين
بس عشان ينشروا الوعي الديني
اللي بيقول ان مايحدث من المحرمات
وفعلاهذه نصوص مؤكدة
لان فعلا كل الاديان بتحرم الاعتداء
علي حرمات الغير
مع المطالبة من جانبنا بمعاقبة
من اعتدوا علي الحرمات
بالقانون

Ms Venus يقول...

سواح

انا موافقاك انهم يزودوا الوعى الدينى الصح المعتدل


لكن مش يفرضوا على الجيش يعمل وينفذ


القانون امتى وازاى



حاجة مش مقبولة

ثم انى ازاى اروح اخد اذن من المعتدى على ان المعتدى عليه يرجع مكانه

مش قادرة افهمها انا دى

سواح في ملك اللــــــــــــــــــه- يقول...

لا هما مابصولهاش كدة
بصولها ان ممكن تتبني ارغاما عن الناس
بس هتفضل ضغينة في النفوس
وتغيير المفاهيم الدينية
يمنع الضغينة
وبعدين القوات المسلحة
تعلن والقانون يعاقب من تسببوا
انا شايف ان تفهيم الدين الصحيح مهم
عشان للقري عادات وتقاليد
وتدين اكثر من المدن
سواء مسلم او مسيحي
واصر علي تمسكي بالقوانين

سواح في ملك اللــــــــــــــــــه- يقول...

عايزك تتفرجي علي عمرو خالد
علي القناة الاولي

Ms Venus يقول...

هى دى المشكلة اللى كنت بتكلم عنها يا سواح فى بوستات قبل كده


وانت مكنتش بتصدقنى اوقات

الضغينة دى ليه وجت منين ؟


بس على العموم هى للاسف موجودة جوة نفوس كتير


وعاوزين وقت كبيرررررررر علشان نتخلص منها


واول طريق هو سيادة القانون


القانون اولا وثانيا وثالثا




بالنسبة للدكتور عمرو خالد انا بحترمه اصلا من زمان

لانه شخصية جديدة بالاحترام


واكيد هتفرج على لقاءه

سواح في ملك اللــــــــــــــــــه- يقول...

انشاء الله نامل في مصر خير
وانشاء الله مش هندي فرصة لحد تاني
انه يفرق المصريين ((المصيين))
بعد ماعرفنا مين اللي كان بيحرك
المشاعر
يافينوس دا الشيطان لما بيخش بين اتنين
اخوات اشقاء من ام واب واحد
بيموتوا بعض
والامثال كتير علي كدة
احنا بقينا شعب واعي ومدرك
وثورتنا باذن الله غلي كل الاوضاع
الغلط اللي كانت موجودة
ادعوا اله ان يحفظ مصربمسلميها ومسيحيوها من كل شر
ولا يفرقهم

تحيتي يااطيب فينوس يااختنا الطيبة

روعه الخيال ولوعه الواقع يقول...

انا بصراحه مش عايزة اعلق يا سانو اعلق على ايه وليه هو الحق محتاج رائى هو الواحد لما يطالب بحقه فى بيته يبقى محتاج اذن؟
انا معرفش فى ايه يعنى ايه بيت ناس بتذكر فيه ربنا يتهد ايا كان مسلم مسيحى هى مش ليها حرمات يعنى ايه نطلب ان محدش يتعدى على حرمه الله اى عصر واى تفكير ده . عايزة بس اى مسلم من دول يتخيل ان فى مسجد بيتهد ...

Days and Nights يقول...

الأخت الغالية / فينوس

أنا معاكى فى كل اللى قولتيه ... عارف تفكيرك راقى ومتميز ... بس أنتى مش واخده بالك من حاجة إن مش كل الناس بتفهم زى ما أنتى بتفهمى ... فيه ناس بطبيعتها منقاده بتمشى ورا اللى ماشى ... صدقونى ياجماعة وأنا لكم من الناصحين ... اللى بيحصل دلوقتى دا مش فى مصلحة البلد أبدا ... فيه ناس عاوزه تولعها نار عشان يوصلوا للى هما عاوزينه ... وفيه محاولات كير حاجة عشان تعمل إختلال فى البلد ... السؤال بقى إحنا عارفين الكلام دا كله ومع ذلك بنعطيهم الفرصة فى أنهم يدمرونا ويدمروا البلد ليه مش عارف !!!!

يا ناس البلد فى حاله ما يعلم بيها إلا ربنا ... نركب الموجه مع اللى ماشى وندمرها ونتدمر معاها ولا نصبر شويه وبعدين كده كده مطالبنا ح تتحقق وأنا متأكد من إنها ح تتحقق.

الوضع جدا خطير يا فينوس وداخلين على ثورة جياع بعد ثورة الكرامه... وأنا قلقان جدا.

الكنيسه لازم تتبنى ومش هى بس لأ لازم موضوع قانون دور العباده ده يتنفذ بأسرع وقت ممكن .

دى محاوله واضحة جدا ودنيئه من قبل أشخاص ليهم مصلحة فى كده وللأسف فيه ناس ماشيه وراهم من الطرفين... وبصراحة شديده دا اللى مزعلنى.

Ms Venus يقول...

سواح

ربنا يبعد عننا كلنا

عن كل مصر

الشيطان والآذى

Ms Venus يقول...

روعة


ناس كتير جواهم ضمير

وحاسين بكلامك

ومؤمنين بيه

Ms Venus يقول...

Days and Nights

تامر


موافقاك جدا جدا فى كل كلامك


ومحدش فينا كلنا يختلف ان فى مخطط للى بيحصل


اختلاف وجهة النظر فى حاجة واحدة

هو انى لو اتعاملت بالقانون مع المخطىء المرة دى

اللى يفكر بعد كده

انه يضرب وحدة مصر

هيخاف ويفكر مليون مرة

الناس دى معروفة

ايه اللى معطل معاقبتهم

ده بس السؤال والاستغراب

Ms Venus يقول...

يوميات حارة

قريت تعليق حضرتك

وصدقنى انا مش اتضايقت وبعتذر لو كان تعليقى على حضرتك وصلك المعنى ده

فى نقاط كتير اوى فى تعليق حضرتك محتاجة الرد عليها

بس طبعا محترمة عدم النشر

انا بتشرف بمتابعة حضرتك لمدونتى المتواضعة

ويسعدنى دايما تعليقك

Boneta يقول...

مــش مــن حقــهم يا فيــنوس
دول اهـل ذمــه يا حبــيبتي
زي ما الاخ الغــير معروف بيقولك

Boneta يقول...

يا فينوس اللي بيحـصل ده مـش جديد علينـا سواء من الاعلام الفاســد او من غــيره من النـاس معدومــه الديـن والضمــير .
كل ما الاقباط يطالبوا بقانون بناء دور عباده موحد يقولك انتوا عايزين تعملوا فتنه ومش وقته!!
و كل ما الاقـباط يطالـبوا بحقـوقهم
يطلعــوا يقولولنـا معلش وخلاص ومـش وقته .
نقـول اقبضـوا علي (الارهابيين) اللي هدموا وحرقوا كنيستنا واشكالهم معروفه يقولوا لنا هايحصل بس مـش وقته
نقولهم طيب ابنوا لنا الكنيسه بقالها 10 ايام محروقه والناس متهجرين من بيوتهم يا حرام مش عارفين يدخلوا البلد ويقولو لنا خلاص هانبنيها قوموا يلا امشوا من هنا وكأننا بنشحت منهم حقوقنا.
نقولهم عندنا كنايس بقالها 25 سنه يا كفره مش عارفين ندخلها يقولوا لنا مش وقته والامن لا يسمح!!بقالـنا 40 سنه بيقولـولنا مش وقـته !! نفسي اعيش لغايه ما اشوف وقته ده اللي مش عاوز يجـي خالص .
ثم امن ايه اللي لا يسمح شويه المجاذيب دول؟ اذا كانوا مش قادرين علي شويه عربجيه ورعاع في حته قريه لا راحت ولا جت فالحين بس يعملوا رجاله علي اديرتنا واولادنا ويضربوهم بالرصاص الحي؟ والاستاذ سواح بيقولك وجود رجال الدين شيء كويس طيب انا معاك ولما راحوا يهدوا سور الدير والناس اعترضوا مش استعانوا ليه برجال دين علشان يحلوا الموقف بدل ما يضربوهم بالنار في حين انهم لا بلطجيه ولا مجرمين زي عربجيه اطفيح اللي رايحين يتفاوضوا معاهم ويطبطبوا عليهم اسبوع وياخدوا منهم السماح علشان يدخلوهم القريه؟

Boneta يقول...

الشيخ المحترم طالع يقول سحر في الكنيسه؟علي راي صديق مسلم كنت بتكلم معاه وبسأله انت تصدق كلام الشيخ ده ؟بيقولي يابنتي ماحنا عارفين انه بيكدب دا احنا بنجيلكم الكنايس تطلعوا لنا العفاريت وتفكوا لنا الاسحار بالصلاه بتاعتكم قلتله الحمد لله ان فيه ناس لسه بتشغل مخها وفاهمه الليله كويس لكن مش كل الناس بتفكر زييك كده وناس كتيره مغيبه ومشحونه مننا وبسهوله جدا يهجموا علي باقي الكنايس ويهدموها ويحرقوها بحجه انها بتمارس السحر زي ما الشيخ قال في التليفزيون .
فضيحه الاعلام الفاسد اللي عامل فيها عبيط من اول المظاهرات واول ما يتكلم يجيب واحد يتهم الكنيسه بالكلام ده؟ هو ده العدل؟ انك تستضيف الطرف المعتدي؟ وتعرض وجهه نظره؟ وطلباته كمان؟
الشيخ بيقول انا اشترطـــت علي الجيش انه مش هايبني لبنه واحده في الكنيسه غير لما يشوف طلبات الشباب الثائر؟هو المجرم والارهابي في مصر بقي شباب ثائر و بيتفاوضوا معاه وبيستاذنوا منه وكمان عنده شروط؟وهو الشيح حسان ايه سلطته السياسيه علشان يشترط علي الجـــــــيش المصـــري عدم بناء الكنيسه لصالح شويه مجرمين ؟
احنا فين احنا هنا؟
يا نهار اسود لما الجيش اللي بيحمي دوله كامله زي مصر مش قادر علي كام عيل في قريه
ولا هي الاوامر دي مش بتتنفذ غير علي الاقباط بما انهم مش ليهم تمن ولا ديه؟
واضح يا فينوس ان في مؤامره دنيئه علي شعب مصر مش هاقول علي الاقباط لان الاقباط اذا حصلهم اي ضرر فطبيعي بينعكس علي مصر كلها وياريت اللي بيلعبوا بالنار يفهموا كده كويس ان مش من مصلحه اي مصري اللي بيحصل في البلد دلوقتي .وقيادات الجيش بدل ما بيتفاوضوا مع الارهابيين العدل والمنطق يقول انهم يقبضوا عليهم ويحاكموهم محاكمه عسكريه علشان يكونوا عبره لاي شخص يفكر انه يمد ايه علي اي دار عباده بعد كده.
انما اطبطب وادلع وابرر للمجرم واقول اصل سحر وقله ادب يبقي انا كده موافــــق علي اللي حصل في الكنيسه .

ابراهيم رزق يقول...

حقك و حقك و حقك كمان

بس احنا لازم نبص للموضوع من بعيد عشان نعرف ابعاده انا رحت اطفيح و قابلت الناس الناس هناك طيبين خالص مسيحين و مسلمين لكنهم ارض خصبة لاى شىء بفعل الجهل و الفقر و المرض حتى الناس اللى قاموا بالهدم انا مش باعزرهم لكنخم اداة فنحن لا نحاسب المسدس و لكن نحاسب من امسك به و اطلق النار عضوى الوطنى اصحاب موقعة الجمل قبض عليهم و انشاء الله عضو الوطنى بتاع اطفيح سيقبض عليه بعد اثبات ادانته لان هؤلاء هم المحركون
و مرة اخرى اغضبى كما شئتى فهذا حقك
خالص تحياتى

~ISLAM~ يقول...

بصراحه مبقتش اتابع الاخبار يا فينوس
عشان مكتئبش
بس كل اللى اقدر اقوله ربنا يصلح الحال
تحياتى ليكى

Ms Venus يقول...

بونى

هزود ايه على كلامك ؟


ما انتى قولتى كل حاجة

Ms Venus يقول...

استاذ ابراهيم



ما هم معروفين وباينين صوت وصورة


لكن محدش قرب منهم


الوضع سخيف ومقزز


بلطجة وارهاب واعلام فاسد كداب


لكن خلاص الصوت على ومحدش هيسكت على حقه

Ms Venus يقول...

اسلام


الاكتئاب ورانا ورانا يا اسلام


ومصر ربنا يستر عليها من الايام الجاية

غير معرف يقول...

السلام عليكم ورحمة الله وبركاته
لا والله انا مش زعلان انا حستنى انا اسائت
وقدرت انفعالك لكن معرفتش انا غلطت فى اية
وبالنسبة للنقاط اللى حضريتك بتقولى عاوزة تردى عليه اطرحيها فى اى وقت وانا كل ما ربنا يسهل والنت ميرخمش هرد عليها ان شا ءالله

خالص تحياتى وتقديرى
يوميات حارة
وبغير معروف بردوا من غير زعل
ههههههههههههههه