الاثنين، مارس 07، 2011

ربنا موجود



طبعا انا سكت وقولت مش هتكلم عن الموضوع

لأسباب كتير اوى

بس السبب الأهم هو انى عارفة وواثقة ان ناس كتير عندهم ضمير

ومن جواهم

رافضين اللى حصل


بس حابة اقول كلمتين

مش للمصريين على فكرة

او بالمعنى الاصح

مش للمصريين (الصح )

كلمتى دى للناس او للأشكال اللى فى الفيديو


هقولهم كلمة واحدة


زى ما الشعب المصرى ( الصح ) اللى بكل اطيافه وافكاره واعماره

الشعب المصرى ( الصح ) اللى قدر يتوحد تحت العلم فى التحرير

ودابت خالص كل الفروق

سواء بقى مسلم او مسيحى او بهائى او لا دينى او او او


الشعب المصرى ( الصح )


زى ما قدر يرمى القذارة والفساد برة

هيرميكوا انتوا كمان برة

وينضف مصر


لان مصر للشرفاء والانقياء

واصحاب العقول والضمائر فقط

اما انتوا واللى زيكم


مالكوش مكان بينا


والصبر جميل

والشر
والظلم لازم لهم نهاية

والايام بتشهد



؛

هناك 37 تعليقًا:

mrmr يقول...

بس للاسف يا فينوس دول مصريين ومسلمين
لكن الظلم عمى عيونهم
الرب قال ليا النقمه انا اجازى
منتظره عمل ربنا
وان كان ربنا يرضيه اللى حصل والعبث فى اجساد القديسين والهدم والحرق وطرد الناس من بيتهم ونهب المنزل والرعب اللى الناس عايشه فيه يبقى احنا لازم نرضى وننتظر فقط الانتقام الالهى
ربنا طويل البال
لكن بنتضرع اليه ونقوله بلاش يارب تطول بالك فى دى علشان قلوبنا تهدى من النار المشتعله فيها

هبة فاروق يقول...

لا حول ولا قوة الا بالله
انا مسلمة و بعترض ومستائة جدا على كل اللى شوفتة فى الكليب
دول ناس جهلة ومعندهمش ادنى فكرة عن الاسلام وتعاليمة
نأسف جميعا كمسلمين لما حدث وهؤلاء الاشخاص ليسو منا

Ms Venus يقول...

مرمر


الصبر معلش

وادينا شايفين ايد ربنا بتشتغل ازاى

Ms Venus يقول...

هبة

انا عارفة يا هبة

ان الاشكال دى مش هما المصريين الصح


وعلشان كده انا عارفة انهم هيترموا برة مصر

لكن الفاسد والقذر مالوش مكان بينا

سندباد يقول...

فينوس التدوين
انتي صح وكلامك منطقي للغاية وكل المصريين الصح اللي بيحبوا مصر وبيفكروا صح مش ممكن يعملوا كده اما الماجورين والنخربين والجاهلين واللي معنهمش دين ولا عقل ودول مصريين برضه بس مش مصريين صح هما اللي بيعملوا كده
وعلي العموم زي ما قلتي الصبر الجميل
وحسبي الله ونعم الوكيل

فاروق سحير ( فاروق بن النيل ) يقول...

فينوس.......
كلنا مصريون شرفاء نرفض ماحدث
أنا وزوجتى وأولادى قلنا كيف يسكت الجيش على ذلك ويتركهم حتى يهدموا الكنيسة هذا والله لايرضاه الله ولا الملائكة ولاالناس الشرفاء ولاالمؤمنون هؤلاء هم المفدسون فى الأرض نحن والرسول محمد صلى الله عليه وسلم بريئون منهم إلى يوم القيامة والله بريئ منهم إقرأى قصيدتى " حبيبتى " الجديدة فرغت منها الآن وشكرا لكى صبرا يافينوس فالفساد الأمنى مازال يطال الكثيرين ( أحد أقاربى قتل بيد الأمن منذ أسبوعان والحمد لله على كل حال ربنا ينتقم منهم

Days and Nights يقول...

الأخت العزيزة والغاليه / فينوس

طبعا أكيد أنتى عارفه رأيى فى شوية الجهلة دول ،اللى فيه حيوانات عقولها أنظف منهم وبتفهم عنهم .

من الآخر كده الناس دى أيامهم فى مصر بقت قليلة ... اللى عايز يعيش فى مصر محترم أهلا وسهلا ... مش عاجبة الكلام ده ياريت يشوف له بلد تانية يعيش فيها ... الكلام ده لكل الديانات واللى ح يغلط هو حر وذنبه على جنبه... وحكم الدين الإسلامى فى اللى بيعمل فساد فى الأرض معروف ورادع ألا وهو القتل أو الصلب أو قطع الأرجل والأيدى ... أو النفى من البلد ... وأنتى أخترتى آخر حاجه وأنا معاكى .

عندى أمل كبير جدا فى ربنا سبحانة وتعالى وفى القضاء المصرى وفى الثورة الجديدة إن فيه مفاهيم كتير ح تتغير قريب .

دمتى بكل الود

أخوك / تامر

Mona Hekal يقول...

اول مرة اعلق عندك وبجد شئ مقرف و حقير ان فيه عقليات كده مش فاهمة حاجة دول لو مسلمين و فاهمين كانوا عرفوا ان ده غلط و مش بطوله ابدا و لا ارضاء لربنا زي ما هما فاكرين عاملين يهتفوا الله اكبر الله اكبر علي ايه هما بيحرروا فلسطين ارحمنا يا رب من الاشكال دي و من الفتن اللي بيزرعوها بجهلهم

Tears يقول...

معاكى حق فى كل كلمة

بعد ما شفت الوثائق و ان السلفيين شغالين مع امن الدولة و ان فيه بلاوى عرفت اننا كنا واقعين فى عصابة...بكرة يتحاكموا بتهمة الخيانة العظمى بالذات لما شفت اللينكات اللى فى التعليقات بتاعه البوست اللى قبل ده


ربنا كبير و لما بنسعى بيوفقنا

Unknown يقول...

أنا مش عارفه ازاي في ناس بالعقليات المتخلفه دي و فين أي نوع من الأمن أو حتى الأهالي عشان يحموا الأماكن المقدسه دي أنا متضايقه أوي و مش قادره أتخيل لازم الشرطه ترجع بسرعه عشان الأشكال الضاله دي
دول ماعرفوش يعملوا كده في أمن الدوله و فين الجيش
منهم لله و ربنا يصلح الحال
تحياتي فينوس

سواح في ملك اللــــــــــــــــــه- يقول...

عــــــيب اوي الكلام ده يحصل في مصر
لازم يبقي في قوانين صارمة ضد الاضطهاد
الديني
معرفش تتعمل ازاي بس لازم يبقي فيه
حقوقيين ودستوريين يضعوا نصوص رادعة
تجرم الاضطهاد الديني
ده الحل العملي

الشاعر الفنان أحمد فتحى فؤاد يقول...

اختنا العزيزة فينوس

نحن أخوة نعيش فوق ارض واحدة و حلم واحد

دمنا واحد حياتنا واحدة أمانينا واحدة كياننا واحد

اصبري فما صبرك الا بالله

كل شئ هيبقي احسن

و الايام الجاية اجمل

صدقيني

أخوكي احمد

Boneta يقول...

انا مش هاعلق علي الفيديو ولا ع الحيوانات الناطقه اللي جواه
انا عندي كام سؤال بس وياريت اي حد من اخواتنا المصريين المسلمين يجاوبني بصراحه.
هـل الاف الهــمج اللي حرقوا الكنيسه وهدموها ودنسوا رفات قديسيها (كلهم) مش مصريين ومش مسلمين؟ اومال ديانتهم ايه الكفره دول ؟ نحب نعرف برضه!!
وبعدين اذا كان القائد الهمام بتاعهم هو شيخ المسجد ومن وراه باقي اهل القريه المحترمين بيهدوا الكنيسه والشيخ المحترم بيقولهم يلا عاوزيييين نصلي يعني والله عمري ماشفت كده ناس تدبح علي شاشات التليفزيون وهما بيكبروا وناس تهدم بيوت عباده ويقولوا يلا نصلي ؟ هايصلي لمين وهايقولوله ايه؟
هايصلوا لربهم وهايقولوا له( نام مرتاح حرقنالك الكنيسه ووسخناها وهجرنا المسيحيين من بيوتهم واتحرشنا بالسيدات المسيحيات في بيوتهم)هو اللي عمل القذاره والهمجيه دي كلها ممكن يكون عنده رب اساسا يصلي له؟
وسؤال كمان هو فين شيخ الازهــر الشريف اللي طلع علينا وقت حادث القديسين واتضايق قوي لما بابا الفاتيكان طلب حمايه المسيحيين في الشرق الاوسط وقال ان الاقباط في حمايه الاسلام؟ تمام فينه بقي من اللي بيحصل للاقباط اللي بيدعي انهم في حمايته؟ ولا هي دي الحمايه اللي يقصدها؟ احنا عايزين شيخ الازهر يقدم اعتذار رسمي للاقباط عن حرق كنيستنااللي اتدمرت من المسلمين المتشددين وهي في حمايه سيادته ويجرم اللي عمل كده . وكفايه كلام زي احنا اخوات ونسيج واحد
بصراحه كده خلاص شبعنا كلام من النوع ده ومحتاجين تنفيذ علي ارض الواقع .الاخوات يحبوا بعض ويخافوا علي بعض ويحترموا مشاعر بعض ولا يزدروا من معتقدات بعض وده مش موجوده عند الاغلبيه المتطرفه .طبعا فيه ناس محترمه ومش عاجبها الوضع ده بس اقليه مش اغلبيه ووجودهم غير مؤثر علي الشارع المصري بل بيتم تكفيرهم لما بيدافعوا عن حقوق المسيحيين زي الاستاذه فاطمه ناعوت والاستاذ عبد الرحيم علي وغيرهم من الاساتذه المصريين المسلمين الشرفاء واللي بجد بيحبوا مصر وكل المصريين ومش بيفرقوا بين المصريين بسبب معتقداتهم.
تحياتي فينوس
وربنا موجود

Tears يقول...

http://www.youtube.com/watch?v=YkyW2xBAmXw

رحاب صالح يقول...

كل شييء له نهاية
ومفيش شيء ثابت علي حاله
ومهما حصل ومهما تجبر الظالمون
لابد من نهاية لهم

شهر زاد يقول...

حبيبتي فينوس
منت قلتيها الصبر جميل
واتاكدي انوووو لعملو كده لا يمتون للاسلام بصلة
تحياتي

أحمد الصعيدي يقول...

صغيرتي

أنا أتفق ىمعك

وفسرت ما فسرت من قبل

إلا أن يجمع مابين الاسلام والمسيحية في ناحية
والبهائية في ناحية اخري

لا يا فينوس

نحن مناهج سماوية نحن وانتم

أما هم

شوية ناس فاضيين قالوا هنعمل دين جديد

اسف فينوس بس لأول مرة من معرفتي بمدونتك وبشخصك المحترم أول مرة أود لو أني لم أحضر هنا

شكرا للإهانة اللاإرادية

Ms Venus يقول...

يا احمد انت سايب الموضوع والمشكلة الاساسية وجاى معترض على البهائية ؟


يعنى مش عارفة هما البهائيين او حتى اللى بيعبدوا الشجرة دول مش ناس ؟؟

ولا انا ولا انت هنحاسبهم


ربنا هو اللى هيحااسب الجميع

لكن حقهم وحق اى انسااان على الارض العيش فى امان


امااان تام مهما كان فكره


وانا هنا مش بناقش اديان وده سماوى و وده لا


اشكرك على وجودك

Mona يقول...

معنديش تعليق غير:

حسبى الله ونعم الوكيل
حسبى الله ونعم الوكيل

وفعلا الصبر جميل

Boneta يقول...

احمد الصعيدي
مع احترامي لرأي حضرتك لكن اسمح لي اقولك ان كلام فينوس مش فيه اي اهانه اراديه او غير اراديه لاي شخص .
الاهانه سيدي هي في مضمون كلامك انت
لانك وبطريقه ( لا اراديه )ازدريت (من ازدراء) بمعتقد اشخاص هم البهائيين
ونسيت حضرتك انهم بشر ومن ابسط حقوقهم الانسانيه هي حريه العباده واحترام معتقداتهم سواء منك أو مني أومن اي شخص ايا كان .
وببساطه شديده اكتر لايحق لاي شخص مهما كان دينه ان يدعي احتكاره للحقيقه وان دينه هو الاحق والباقي ولا حاجه وكفار .
لان كل معتقد له مخالفين له وانا كنصرانيه اعتبر كافره بالنسبه لمعتقدك وكتبي السماويه محرفه وانت كمسلم قد ينظر اليك البعض ان دينك غير سماوي وانت ايضا تنظر للبهائي واي شخص ديانته مخالفه لعقيدتك انه كافر ودينه غير سماوي وهكذا دواليك وكل صاحب معتقد بيحاول جاهد تكفير الاخر له لاثبات صحه معتقده علي حساب معتقدات الاخرين.
فا اذا كنت انت بتستاء من لو شخص كفر بمعتقدك فا من باب احترام مشاعر ومعتقدات الاخرين انت كمان لازم تراعي شعور اي شخص مهما كان معتقده حتي ولو بيعبد حجر طالما لم يرميك به .لان كل انسان يا استاذ احمد دينه ومعتقده غالي عليه وشايف انه هو الاصح علي الاطلاق حتي ولو كان بيعبد نار او حتي حجاره فهو من حقه اختيار ما يعبد طالما الله خالق الكون خلقه حــر .
واذا كان ربنا عاوزنا كلنا نبقي دين واحد او اتنين بس كان خلقنا كلنا من الاول مسلمين بس او مسيحيين بس وريح نفسه وريحنا من وجع الدماغ ده.
لكن لانه خلق الانسان حر فا ترك لنا حريه كل شيء حتي عبادتنا له لان عباده الله مش بالاجبار لانه إله قادر وقوي ولا يحتاج الينا لكن نحن من نحتاج اليه ونسعي دائما لان نكون له ومعه .
اذن لا داعي لان نكفر او نقلل من شأن اي انسان مخالف لنا في العقيده (سواء مسلم أومسيحي او يهودي أو بهائي أواحمدي أو شيعي أو بوذي و زرداتشي أوعابد بقر او نار...الخ) لان علاقه الانسان وربه علاقه خاصـــه جدا مش من حق اي انسان انه يتدخل فيها .
تقبل تحياتي

Ms Venus يقول...

سندباد


ايوة يا سندباد

مش دول ابدا المصريين


واكيد الشر له نهاية

Ms Venus يقول...

استاذ فاروق


البقاء لله فى قريب حضرتك وربنا يرحمه يارب ويصبركم


ولازم المحاسبة والقصاص من كل مفسد

لاااازم

Ms Venus يقول...

Days and Nights

متفقة معاك تماما يا تامر


وادينا مستنين العقاب الرادع

Ms Venus يقول...

منى ابو السعود


نفس كلامى يا منى

ما يروحوا بشطارتهم دى يحرروا فلسطين

او يساعدوا اهل ليبيا

Ms Venus يقول...

تيرز


والحل ايه ؟


الناس مستكترة حتى ان اللى بيندبح يصرخ

والكل يقول مش وقته مش وقته


لحد امتى ؟؟؟؟؟؟؟؟؟؟؟

Ms Venus يقول...

شيرين


الحل فى العقاب الرادع يا شيرين

غير كده انسى ان الاشكال الضالة دى تتلم

Ms Venus يقول...

سواح


ايوة عيب جدا وعار على كل انسان شريف

فين بقى العقاب ؟؟

لحد دلوقتى مافيش اى عقاب

Ms Venus يقول...

استاذ احمد


الاخوة والنسيج مش كلام وبس معلش سامحنى

لازم تترجم عمليا


قولى حصل ايه عمليا لحد دلوقتى علشااان اصدق ده؟


او انا مصدقاه

لكن الناس اللى اتظلمت تصدق امتى وازاى ؟

ده السؤال

Ms Venus يقول...

بونى


تفتكرى يعنى هعلق على كلامك اقول ايه ؟

Ms Venus يقول...

تيرز


جميل اللينك والروح اللى فيه

بس قوليلى ده يعمل ايه للمظلوم ؟؟

Ms Venus يقول...

رحاب

ايوة وده اللى انا بقوله وواثقة منه


ان الاشكال دى لازم لهم نهااية

Ms Venus يقول...

شهرزاد


مش مهم انا اتأكد

المهم ان المظلوم ياخد حقه


والجانى يتعااقب عقاب رادع


ده القانون صح ؟

Ms Venus يقول...

منى

ال لا تعليق بتاعك
تعليق وصل احساسه

سبهللة يقول...

قريت كلامك ووجع قلبى
وجع قلبى
طيب انتى واحدة فاهمة ان دول مزقوقين من امن الدولة
مش كل النا هاتفهم كدة
بدعى من قلبى ان كل المصريين يفهموا لان بجد احنا داخلين على ايام ما يعلم بيها ربنا

Story pain يقول...

كل طرقة استشعرتها كما لو انها تهدم مسجد..فكما أصابت الكنيسة اصابت قلبى وقلوب المسلمين..يعلم الله اننا ندعو الله ونلجأ اليه ان يحميكم ويحفظكم ويحقن دماءكم وندعو على أولئك الذين لايعرفون عن الاسلام شيئا أن ينتقم الله منهم ويجعل ثأرهم فى نحورهم

لم يعد الصبر جميل لم نعد نتحمل دماءكم التى تسيل ودموعكم التى تبكى ضحاياكم

اذا كانوا يريدون احداث الفتنة بيننا فلماذا تدفعون وحدكم الثمن..ليتها لم تكن كنيسة وليت الضحايا جميعهم مسلمون..فانا لم أعد اتحمل ما يحدث لكم
دماؤكم دماؤنا..ومقدساتكم مقدساتنا فحسبنا الله ونعم الوكيل.

تذكر يا كل من يصيب مسيحيا بأى أذى اننا لسنا فقط من نتوعد لك بل ان الرسول صلى الله عليه وسلم توعد لك فقال( "من آذى ذميا فأنا خصمه، ومن كنت خصمه خصمته يوم القيامة".
وقال أيضا("من قتل معاهدا لم يرح رائحة الجنة، وإن ريحها لتوجد من مسيرة أربعين عاما
عزائى لك حبيبتى ولك مصرى
ادام الله محبتنا واخوتنا

Story pain يقول...

Boneta

وانا اشاهد الفيديو سألت نفسي الاسئلة دى..ايه الناس دى وازاى بيقولوا الله اكبر وهما بيهدموا الكنيسة وصلاة ايه اللى هيصلوها وفى سؤال مهم جدا لازم اعرف اجابته هو كان فى امام مسجد موجود فى الوقت ده وبيهدم الكنيسة والمفروض انه معروف ولسه ماتعدمش فى ميدان عام ..كان فين الناس وقت الهدم واقفين يتفرجوا وفين الجيش...اما باه عن شيخ الازهر فنحن كمسلمين لا ننتظر منه ان يتحدث وهو لا يمثل المسلمين فى مصر لكن فى رموز اسلامية كتير اتكلمت ومش هتسكت
بس خلاص احنا تعبنا من الكلام علشان كده انا مش هقولك أخوة ونسيج واحد
انا وكل مسلم فاهم دينه صح وكل مصرى هتلائينا معاكم فعلا وليس قولا
لو بصيتى فى اي مظاهرة هتلائينا وافقين جنبك وبنهتف معاكى وزيك برده مش هنرتاح غير لما يتحاكم المجرمين اللى عملوا كده

ولان كلامنا عن الاخوة باه مستفز ومابيعملش حاجه ورغم انه صادق ماعدش من المكم وحزنكم بيوصل لقلوبكم اتمنى اننا كمسلمين نثبتلكم فعلا انكم اخواتنا وان مافيش فرق بينا وبينكم

يارب نقدر نعمل حاجة نرجعلكم حقوقكم ونحميكم ...يارب احميكم واحفظكم

Ms Venus يقول...

story pain


مش هقولك غير ان عينى دمعت وانا بقراء تعليقك


واسمحى لى هنقل تعليقك واعمل بيه بوست