السبت، فبراير 05، 2011

هو احنا مين ؟ طب عاوزين ايه ؟


شعب كان ميت


او نايم


مسجون واسير


فجأة صحى


وخرج يطلب حقوقه


كسر حاجز الخوف لأول مرة من سنين


اتعلم يقول عاوز ايه واتعلم يكون صوته عالى


لحد هنا كويس اوى

لكن فى شىء مرعب ابتدى يحصل


اتقسمنا لنصفين كل نصف فيهم بيرمى الاتهامات على التانى


الناس اللى بتنادى اننا نحكم العقل ونهدى شوية ونحاول ندى فرصة للإصلاح ولو حصل يبقى خير وبركة محصلش نقدر تانى نطلع ونقدر تانى نقول لا


بيتقال عليهم فرافير او جبناء او عندهم خنوع او عملاء للنظام الفاسد



والناس اللى لسه مصممين على موقفهم وعلى وجودهم فى التحرير


بيتقال عليهم مسيسين وأغلبهم وراهم جهات داخلية او خارجية



طب يا ناس هو احنا مين ؟

هو احنا عاوزين ديمقراطية ولا عاوزين ايه ؟


ازاى عاوزين حاجة وهى مش جوانا

ليه مش متعلمين نسمع بعض؟


ليه بنرمى التهم على بعض ؟

ليه كل واحد مفترض ان هو بس اللى صح ؟


هى دى الديمقراطية اللى عاوزينها يا ناس ؟


كلنا خايفين على بلدنا وبنحبها

ياريت نعرف نحبها صح

وميتحولش حبنا ليها للقول اللى بيقول


ومن الحب ما قتل



مصــــــــر بتخســـــــــــر يا ناس


يالى بتحبوها خافوا عليها

هناك 20 تعليقًا:

Tears يقول...

فينوس مافيش وقت لكل ده

المشكلة ان الناس مش قد الحدث بمعنى انهم مش عارفين يعنى ايه ثورة و فاهمينها مظاهرة

قريتى عن ثورة الصين و قرغزيا و الثورات الاقدم فى التاريخ؟؟ لو كنتى قريتى ح تفهمى ان لو اللى بيحصل وقف مبارك ح يرجع شرس و ح ينتقم من الكل و ده اللى حصل فى الصين بعد ما مات مئات الالاف و اعتبروها مجرد صفحة فى التاريخ

اسمعوا د.علاء الاسوانى و د.احمد عكاشة لان دول ناس على الاقل ليهم مكانة و محترمين و ح تلاقى ان كل اللى قلتهولك ده قالوه...مافيش وقت كل حاجة تضيع حرام الدم اللى راح و اللى ح يروح

Ms Venus يقول...

يا تيرز الراجل قال انا ماشى

مش عاوزها


الوقت اللى فاضل ده علشان يكون فى انتقال صح للسطة

نعمل انتخابات ونختار اللى عاوزينه


وبعدين انا هسالك سؤال


وقت حادثة القديسين انتى قولتى دى اسرائيل

وده هدفها

وده مخططها


ليه دلوقتى مستبعدين نظرية المؤامرة دى ؟


هرجع تانى للموضوع


والله انا ما بقول الدم يروح هدر


لكن بقول بالعقل نتحرك


يا جماعة مش فى يوم وليلة كل شىء يتحرك

طب لو هو مشى دلوقتى

حالا


طب مين مكانه ؟؟؟


ما ندي فرصة


واحنا موجودين


اتحققت مطالبنا كويس

لم تتحقق نكمل


محدش هيصلح فساد 30 سنة

فى يوم

اسيره الاحزان يقول...

احنا عاملين زى اللى حضر عفريت ومش عارف يصرفه وطالما حد بيقول راى غير رايك يبقى قابض وعميل وخاين

الراجل قال انه هيعمل كل اللى احنا عايزينه اللى بيتعمل دا يبقى اسمه قله ادب وسفاله والله عشان انا لو ابويا انشغل عنى ولا زعقلى ولا عمل فيا اى حاجه انا مقدرش اطرده من بيته والراجل دا ليه فى البلد اكتر ما احنا لينا


ربنا يسترها معانا يااااارب ويسترها على مصر

غير معرف يقول...

أحنا مين ؟؟
أحنا المصريين
شعب مصر

طب عاوزين إيه ؟؟
عايزين الأمان
الإستقرار
عيشه كريمه لنا ولأولادنا
ديمقراطيه
عايزين حق دم شاببنا اللى ضاع
عايزين الرحمه

عايزين مصر تفضل مصر
رافعين رسنا

ربنا يحميكى يا مصرنا الحبيبه

فاروق سحير ( فاروق بن النيل ) يقول...

Venus
لسة بتصدقى الراجل ده..........
لسة بعد 35 عام ( 5 نائب و30 رئيس دكتاتور ظالم حرامى ) لم يستطع أن يفعل كل ده فينا من غير :
1- طوارئ تعطى الفرصة لغياب القانون
2- رجال أعمال فاسدين بينهبوا أراضى ومال الشعب
3- مجلس شعب وشورى مزور
4- حزب أوحد ليس له مثيل بالعالم مزور ورئيسه هو رئيس الدولة
5- وزراء فاهمين إنها أبعدية أبوهم
6- وزير داخلية إستغل هو وأعوانه من أمن الدولة الأمن القومى الأمن العام الشرطة الشرطة السرية البلطجية لكى يقتل من يشاء ويسجن من يشاء ويعذب من يشاء ويسلب لأموال من يشاء يلفق التهم كما يشاء تحت حجة الطوارئ
7- ديون من 60 مليون جنية إلى أكثر من 150 مليار جنيه
8- إرتفاع الأسعار فى تلك الفترة بزيادة حوالى 1000%(من 1981م - 2011م)
9- غاز ينقل لإسرائيل تقريبا ببلاش فى حين الشعب يقف بطوابير لشراء أنابيب الغاز ومرتين بالأسبوع وصل سعر الأنبوبة من 2.75 جنيه إلى 27 جنيه
10- تفاقم البطالة حتى أن الخريجين من الجامعات والمدارس الفنية فقدوا الأمل نهائيا بالعمل والحياة الطبيعية والسكن والزواج والمستقبل
11- زاد عدد المليارديرات فى مصر فمثلا أحمد عز بعد إغلاق شركة الحديد والصلب بحلوان وأصبح المتحكم والمحتكر للحديد فى مصر وبعد أن كان يملك بعض ملايين أصبح يملك 60 مليار جنيه .
12- زهير جرانة وزير السياحة كان يملك قبل تولى منصبه 6 مليون جنيه أصبح الآن
يملك أكثر من 40 مليار جنيه
وعلى فكره كلاهما أصدر قرار من النائب العام بالتحفظ على أموالهم ومنعهم من السفر للخارج لإضافة إلى الوزيرأحمد المغربى والوزير رشيد محمد رشيد ووزير الجزارة والقتل حبيب العادلى
13-هؤلاء الخمسة يستطيعوا تسديد ديون مصر كلها بل أن يعوضوا الدولة عما خسرته من أموال بتلك الثورة 25 يناير
14- التفجيرات التى حدثت فى كنيسة القديسان بالإسكندرية تمت تحت سمع الطوارئ ووزارة القتل والجزارة والقمع فى حين أنه عندما إختفت من الشارع المصرى من الساعة الرابعة يوم 28 يناير 2011 م( منذ ثمانى أيام ) لم تحدث تفجيرات واحدة بكنيسة أو حالة تحرش واحدة من الناس العادية
15- تلك الفترة حدث نهب وسلب وحرق لبنوك ومنشآت وفتح للسجون وأنتى تعرفى من قام بذلك بل أن رئيس الوزراء بصدد محاسبة وزارة الداخلية السابقة على ذلك
16- قام أفراد الشعب بحماية ممتلكاتهم وأهلهم وبيوتهم من مخربى وبلطجية وزارة الداخلية.
17- الأقباط منذ تلك الفترة لم يأخذوا حقوقهم حتى يوسف بطرس غالى وزير المالية السابق لم يستطع أن ينفذ ماوعد به وأجبره النظام على سحب أموال المعاشات بالمليارات وإستخدامها بدلا من أخذ ميزانية جديدة من الدولة وأنتى تعرفى أن أى وزير فى مصر لم يكن يستطيع أن يكون حرا فى وزارته ويأخذ قرارا دون الرجوع لكمبارك بل هو يملى عليهم مايريد لصالحه الشخصى ولصالح أسرته
18- كل الحروب والثورات والإحتجاجات والإضرابات تتعرض لوقف مظاهر الحياة تماما أو جزئيا وتخسر مبالغ كبيرة جدا ويضار أهلها وبعد ذلك تنهض وتكون أحسن حالا من ذى قبل والأمثلة كثيرة
" رومانيا- الإتحاد السوفييتى - تشيكسلوفاكيا(الآن تشيك - سلوفاك)- ألمانيا الشرقية وألمانيا الغربية( ألمانيا الموحدة الآن )
19- لاتنظرى للعراق أو أفغانستان الآن فهما مازالا تحت الإحتلال الأمريكى
20- سوف تكتشفين أختى أنكى كنت تسرقين منذ ثلاثين عاما وأن كل فرد فى مصر كان من الممكن أن تتغير حياته للأفضل مما هو عليه هكذا قال المثقفون والعلماء والسياسيون(أ/ علاء الأسوانى- د/أحمد زويل- دكتور/ محمد البرادعى - د/ أحمد عكاشة - نجيب ساويرس - نجيب إسحق)
فكرى فيما قلته وأعيدى قراءته عدة مرات لتربطى بينها ولن أقول لكى أن هناك وثيقة من ورقتين تدل على ماقلت ومرقمة بصادر من وزير الداخلية السابق جبيب العادلى المطلوب جنائيا الآن للمحاكمة تربح ونهب المال العام والإفراط فى إستخدام السلطة وقتل أكثر من 350 مصرى بالمظاهرات ).
وأنا أسألك سؤالا واحدا.......
من فعل كل هذا بنا وبمصر ؟

richardCatheart يقول...

احنا عايزين كل حاجه ما اخدنهاش من سنين

انت شايفه انهم ينفعو هما هما فى اصلاح ما افسدو

متهيالى بعد ماقعدنا من غير عسكرى واحد والنظام الفاشل اللى دخلو فى دمغنا عرفنا ان مافيش فته طائفيه فى مصر
وعرفنا ان هما اللى كانو بيخوفنا من بعض علشان مانبقاش حائط واحد فى وشهم

اساسا اقتصادنا كان فاشل وان كان فى خير بيجى للبد دى كان بيجلهم هما

المطلوب واضح والرفض واضح واسبابه واضحه ان الامور تهدى خلال ال9 شهور دى وترجع عمتك عند خالتك
ماتخفيش يا فيو لان ربنا موجود واللى فى نصبنا هانشوفه

وماتنسيش اللى راحو فى حوادث الكانايس والمظاهرات من اولها لغايه دلوقتى بسببهم

richardCatheart يقول...

ماتصدقيش كلامهم الاهبل بتاع تداول السلاطه دا لانه لو نقل مهامه للنائب نقدر نعمل كل حاجه صح
هو اللى عنيد ومكابر

وحسبيى الله ونعمه الوكيل فيه

miroooo يقول...

عندك حق فعلا يا فينوس البلد انقسمت نصين نص مع ونص ضد بس احنا مش عايزين غير الامان والاستقرار فى وقتنا الحالى
والناس اللى صامدين دول فى ميدان التحرير موقفين حال البلد خالص ومش عايزين يسمعوا غير صوتهم مش عايزين يعطول فرصة للحكومه الجديده ولا للريس اللى قال انه هيمشى كلها كام شهر ويبقى فى انتخابات واحنا اللى هننتخب اللى احنا عايزينه هما مش قادرين يفهموا كده
بس انا واحده من الناس حاسه انه هيبقى فى تطور شديد وديمقراطيه اكتر وان حال البلد هيتصلح ان شاء الله بس عايزين نسمع بعض شوية كمان
ربنا يحمى مصر باذن الله من اى اخطار

Carmen يقول...

كلنا بنتمني حياتنا تبقي احسن وباذن الله المستقبل افضل
يارب

Ms Venus يقول...

يا استاذ فاروق ويا مارو


والله والله انا عارفة كلامكم وعارفة الفساد والقهر اللى كنا فيه

وازود عليكم كمان قهر الاقباط اللى ياما كنا نشتكى ومحدش بيسمعنا


انا مش بخالفكم بالعكس


انا كل اللى بقوله نهدى علشان بلدنا بتخسر وحوالينا ذئاب متربصين


انا مش بدافع عن نظام فاااااسد واستحالة اعمل كده استحالة

ولو فهمتونى كده يبقى اسفة فهمتونى غلط جدااااااا



انا بقول انا خايفة على مصر

خايفة عليها وخايفة كل ده يتقلب ضدنا وضد اهداف الثورة اللى هى فخر وامل كل مصرى

أحمد الصعيدي يقول...

نحن من أقام أجمل ثورة في عهد مصر


ونحن من سيندم إذا استمر الحال علي ذلك سنندم علي أننا ؟أقمناها


فلا تضيعوا تاريخ أجملكم بأفكار أحمقكم

كيف حالك فينوس

عبد الرؤوف بن عبدالسلام (أبوهارون) يقول...

الصبر الصبر وربي معكم

Humman being يقول...

فينوس
احنا كنا اتفقنا من أسبوعسن كدة على حاجة فاكراها ... "ثورة النفوس والعقول" وكنا قلنا عايزين دى الأول

ثورة تونس برغم من انها بلد مش بوزن مصر وحجمها بس الناس فيها عندهم دماغ صح دماغ "غربية" أكتر منها شرقية مؤمنة بحقوق الآخر فى رأى مختلف ... دين مختلف.. لبس مختلف...عادات مختلفة .... محدش قاعد للتانى كدة زينا

أنا كنت حاطة بوست عن رأى وتحليل عماد أديب اللى كان بيقول ان فى بعض التيارات زى الاخوان المسلمين عايزين يركبوا الموجة ..وكان رأيى أنا ان حسنى مبارك يفوض سلطاته ل عمر سليمان ونسيبه هوه طرطور ال 6 شهور دول والبلد تمشى بقه والشركات والمصانع اللى قفلت تفتح

أنا شيلت البوست ده مش عشان رأى عماد أديب مش صح ... لأ صور الشهداء قطعتنى ... كنت هموت ساعة ما شوفتهم
خلتنى تانى أرجع وأقول منك لله ... والله ما احنا سيبينك طرطور ...

لكن الاختلاف فى الرأى شىء صح ومسموح ومقبول وشكل حضارى صحى

الشاعر الفنان أحمد فتحى فؤاد يقول...

فينوس

ربنا يسترها و نعدي الوضع الحالي الي بر الأمان

ربنا يحمي شبابنا و بلادنا يا رب

تحياتي 

Boneta يقول...

مش عارفه اقول ايه
آآآآآآآآآآآه يابلدي
قلبي واجعني عليكي يا امي
يا مصـــــر

Boneta يقول...

فاروق بن النيل
استاذ فاروق لا فينوس ولا اي حد بيصدقه ولا حتي عاوزه وبالاخص الاقباط اللي عانوا الامرين في عصره.
كل مافي الموضوع ان مصـر بلدنـا كلنا اتحرقت واتدمرت وبقت خرابه ولو استمر الوضع علي ماهو عليه من غير تنازلات من المحتجين هاتبقي دمار وهاتتحول المسأله من ثوره اصلاح لثوره جياع
الناس اللي بيشتغلوا باليوميه بقالهم اسبوعين قاعدين في بيوتهم هل في حد هايعوضهم عن وقف حالهم؟ الناس اللي بيشتغلوا في شركات اجنبيه وفجأه لقيوا رؤسائهم هجوا من البلد وفي احتمال انهم يقعدوا من اشغالهم هل في حد هايعوضهم ؟ الناس اللي قافله محلاتها ومالهاش اي مصدر رزق يروحوا فين؟ يعني يموتوا علشان بتوع التحرير يرتاحوا نفسيا ؟يعني بصراحه بقت حاجه مستفزه للكل ولعلمك ان الشعب البسيط بدأ يقلب عليهم لانه مش بيفهم غير لغه رغيف العيش .
وبعدين ربنا عرفوه بالعقل يا ناس دا ربنا جل جلاله عمل الكون في ست ايام احنا عاوزين البلد كلها تتغير في كام يوم ؟ انا ضـــد مبارك وضد نظامه الفاسد ومع متظاهرين 25 يناير الشرفاء في كل مطالبهم اللي اتنفذت وبطريقه مش كنا نحلم بيها حتي .
لكن لازم نكون متعقلين شويه ونبص علي الجانب المظلم في الموضوع
اقتصاد مصر بااااااظ
بلاش نختصر كل اهدافنا في شخص واحد
مبارك كده كده هايرحل وجزمته فوق رقبته
لكن مش في مصلحه "مصـــر"انه يرحل قبل ما يظبط حاجات معينه في البلد والا هاندخل في فوضي مالهاش اخر
والمده الباقيه قصيره بحيث انه مش هايقدر يتحايل علي الشعب وكلامه بانه هايرحل كان قدام العالم كله والدنيا كلها شاهده عليه
المهم دلوقتي اننا نقدر نرجع بلدنا تاني زي ماكانت وبسرعه وكفايه لحد كده خراب اهو هو هايمشي ومعاه المليارات وهايسيبهالنا مخضره
انا في رايي بدل ما بيطالبوا برحيله يطالبوه يرجع اموال الشعب المقهور .وتجميد ارصدته في البنوك كمان بعدها بقي يمشي يقعد مش هاتفرق هو كده كده بقي اكسبيرد مش ليه لازمه.

ذو النون المصري يقول...

الراجل قال انا ما شي لكن انا واثق انه كذاب لانه لم يصدق معنا فياي لحظة في حياته فلماذا سيصدق في لحظة و موقف سيكون علي الاقل فيه فضيحه شخصيه له و قد بدات وقائع هذه الفضيحه بالفعل
اخشي بشده من انتقامه خصوصا ان حلم التوريث ضاع و كل شيء ضاع و ما هو ات بالنسبة له خسائر و فضائح فقط
سيحاول الرجل ان يعود او علي الاقل ينتقم لينقذ ما يمكن انقاذه من سمعته هو لم يتورع عن قتل المئات كي يفعل ذلك و سيقتل غيرهم ان استطاع
ارجو ان اكون مخطيء في تقديري
لكن اري ان لا نعود حتي ينتهي هو

;كارولين فاروق يقول...

فينوس اول مره ازورك
وافهم قد ايه انت متحضره
احنا لازم نسمع بعض
علشان نفهم بعض ولا نخسر بعض
تحياتي تقبلي مروري

ALLELIO- موطنـــــــــــــــــــــــــــى(ma patrie) يقول...

فى مصر انتى اما عميلة او عميلة

ان ساندتى النظام او حسنى مبارك على الاخص فانتى عميلة خائنة للوطن

وان قلتى لا للنظام فانتى مستاجرة من جهات خارجية او داخلية هدفها ضرب النظام

وللاسف الشباب تاة بين النقطتين ولم يعد قادر على التمييز

بالاضافة الى التعنت فى فرض الراى على الغير

Heba Salem Youssef يقول...

فعلا
حضرتك اتيتى على وتر حساس
وهو ان الكل يحاول تبرير وجهة نظرة والتشكيك او محاولة اثبات خطأ وجهة نظر الاخر ..
قال الإمام الشافعى : رأيى صواب يحتمل الخطأ و رأى غيرى خطأ يحتمل الصواب

وكلنا رغم اختلافنا فى وجهة النظر
لا نختلف انها كلها تنبع من دافع حبنا وخوفنا عليها
اسأل الله ان يسلم مصرنا الغالية ..
وبالتوفيق لحضرتك دائما