الاثنين، يناير 03، 2011

اسرائيل والشماعة


معلش يا اخواتى سامحونى

اللى قتلتكم اسرائيل والشماعة

اللى قتلت 25 قبطى فى الكشح ومافيش انسان اخد حتى شهر سجن فيها

هى اسرائيل والشماعة


اللى قتلوا صياغ الزيتون فى عز النهار وبردو مافيش انسان اخد عقاب

هى اسرائيل والشماعة


اللى هجم على رهبان دير ابو فانا المسالمين العزل وضربوهم بالبنادق وعذبوهم

وكالعادة من غير اى عقاب

هى اكيد اسرائيل والشماعة

اللى قتلوا اخواتى فى نجع حمادى واللى كسروا بيوتهم وحرقوها وسرقوها فى فرشوط وديروت


وبردو محدش اتعاقب هى اسرائيل والشماعة




واللى رافض اى كنيسة تتبنى او ترمم هى اسرائيل والشماعة


واللى بيدرسوه فى المدارس وبيعلموه للاطفال انكم كفرة

بردو اسرائيل والشماعة


طب اقولكم حاجة

فى كتاب القراءة بتاع سنة تالتة ابتدائى

خدوا بالكم كويس تالتة ابتدائى

درس من الدروس مكتوب فيه عكس كلمة مسلم هو كافر

كل ده بردو بسبب اسرائيل والشماعة


لما الجامع اللى جنب بيتى يصرخ فى ودنى كل يوم ويقول النصارى الكفرة واليهود الخنازير

هى اسرائيل والشماعة


لما يطلع انسان خايين يدعى بالكذب ان الاديرة والكنائس مليانة اسلحة وفيها اسيرات مسلمات ويهيج البسطاء من الناس ويملاهم كره ضد اخواتهم

اللى خليته يقول كده هى اسرائيل والشماعة

لما تكون المظاهرات فى كل حتة بتشتم فى رموزنا الدينية بمنتهى الوقاحة ومحدش بيقرب لها

كل ده بردو سببه اسرائيل والشماعة


لما انزل الشارع فى رمضان ولان مافيش على راسى حجاب واسمع بودنى تعليقات الناس من تحت لتحت انى مسيحية كافرة

كل ده سببه اسرائيل والشماعة


فلتسقط اسرائيل والشماعة




ارجوكم محدش يزعل من كلامى

انا بفضفض وعينى مليانة بالدموع

هناك 20 تعليقًا:

Tears يقول...

لازم يحصل تغيير عشان النظام ده فاشل و احنا محتاجين دولة مدنية فيها دستور محترم و تداول للسلطة عشان يجى رئيس بيحب مصر و بيخاف عليها و فاضى لشعبها مش للتهليب و سايب كل شر يرتع فيها

عبد الرؤوف بن عبدالسلام (أبوهارون) يقول...

هنا في تونس اذا كنت يهودي لك كل الحقوق ام اذا كنت مسيحي من اصل عربي فسوف تقع مضيقتك من طرف الناس وتعتبر كافر ومرتد
الا ان القانون في تونس نوع ما يحميك حسب مجلة حقوق الانسان.

شهر زاد يقول...

أختي فينوس
انت اختي رغم اختلاف ديانتنا ولي الشرف اني أعتبرك أختي لو انت سمحت بذلك
هي فعلا اسرائيل والشماعة كمان وبس
الثنائي دا بعيد عن حاجة اسمها دين بغض النظر عن هويتو
هو انت فاكرة ان اسرائيل سالكه درب دينها وبطبق تعاليمو بحذافرها أبدا والله
بس حبيبتي انا عرفه ان الجرح عميق وانك والله مطعونة بس لازم الواحد في المواقف دي يفكر بروية وباتزان
علشان مايجرحش الناس
تحياتي ياغاليتي

سواح في ملك اللــــــــــــــــــه- يقول...

فينوس
هونا عليكي
اعلم كمية الغضب التي تغضبينها
ونحن غاضبون مثلك بل واكثر
لاننكر هناك متطرفون علي الجانبين
وهؤلاء الارهابيون لايميزون
واتذكر جرائم الارهاب في التسعينات
كانت تاخذ كل مافي طريقها
مسلم كان او مسيحي
لان الدولة كانت بالنسبة لهؤلاء السفلة
كلها كانت كافرة
ولا انكر ان هناك مكفرون
ولكن اعلمي ان معظم شعب مصر ليس كذلك
فانا متدين ولي اصحاب مسيحيين
ولا احب التشدد في اي شئ
رحم الله من راحوا ضحية هذه القذارة
فهم فقداء مصر جميعا

Ms Venus يقول...

اهلا بيكى يا شهرزاد

وانتى طبعا اختى وبعتز بده

لكن معلش انا مش فاهمة

فين الجرح فى كلامى ؟


كلامى اللى بقوله دى حقائق واضحة وباينة للكل والكل لامسها وشايفها مسلم قبل المسيحى فى مصر

وزى ما قالت تيرز

فتش عن النظام

اهلا بيكى دائما

Mona يقول...

بصى ياغالية هى مش شماعة بس هى الناس مش حابة أن بلدنا أهلها يعيشوا فى سلام ووئام ومش حيسكتوا طول ما فيه أقليات معششة علشان تخرب العقول - وربنا يستر على البلد

واللهم أرحم موتانا جميعا ويلهم أهلهم الصبر والسلوان -

جايدا العزيزي يقول...

خالص عزائنا للاخوة المسيحيين
وبنقولهم ربنا يرحم امواتنا جميعا

اشكرك غاليتى

Boneta يقول...

فينوس
بما اننا كده اتأكدنا ان الشماعه وعزرائيل هما اللي وراء المصايب اللي بتحصل في العالم كله فا ياريت الكل يقول معايا بس من قلبه علشان ربنا يسمع منه
اللهم دمر اسرائيل والشماعه
اللهم يتم اطفال اسرائيل والشماعه
اللهم فجر الدماء في عروق اسرائيل والشماعه .
اللهم رمل نساء اسرائيل والشماعه
اللهم سلط السرطان علي اسرائيل والشماعه .
* ملحوظه هامه جدا
ده اقتباس من دعاء الشيخ الفاضل الزغبي علي اسرائيل والشماعه .
:)وهاضيف عليهم ربنا يكسر قلب ورقبه اسرائيل والشماعه اللي عملوا في اولادنا كده .

سندباد يقول...

لكي الحق في ان تقولي ما تشعرين به وتغضبي وتنفجري ولكن بدون ان تفقدي الثقة في الصالح فينا
لكي تحياتي يافينوس التدوين

سندباد يقول...

لكي الحق في ان تقولي ما تشعرين به وتغضبي وتنفجري ولكن بدون ان تفقدي الثقة في الصالح فينا
لكي تحياتي يافينوس التدوين

هشام الجندي يقول...

فينوس
ليست إسرائيل أو الشماعة
وإنما هو غحساس منا بالقناعة
مسلم وبقولها بصوت عالي
ومش هاستخبها وأقول وأنا مالي
متفتكرش إن السوء من المسلمين
أو التطرف له ملة أو دين
ليه نثور على بعض واحنا في نفس الأرض
لأجل ما نفتح الطريق لناس يقولوا احنا الصديق
الشعور بالغضب من النصارى اتحول لبركان
هو اللي حصل في مبنى اتحاد ألإذاعة والتلفزيون ومنع من بداخله من الخروج تصرف سليم والهجوم على شيخ الأزهر ووزير الأوقاف وسبهم شئ سليم وهموا خارجين من عند البابا شنودة إكرام للضيف في الكتدرائبة بالعباسية أصيب 43 من أفراد قوات الأمن المركزي "8 ضباط و35 مجندا" والعصي والزجاجات في امبابة وزجاجات المولتوف في كنيسة العمرانية
بقولها إلى أخت لم أنظر لديانتها حين عرفتها ولا أهتم ألآن سوى أن بكل ديانة عناصر مخربة فلا تظنى إن ما فعل بأيدي مسلمة أما ما حدث من بعض المخربين المسيحيين كان واضحأً
أرجو أن تدعي معي حملة للكف عن العنصرية والتفرقة باللون والجنس والدين أقولها لكي من رجل يعتز بديانته ويحترمها وبنسبه إلى سيد الأشراف رسول الله صلى الله عليه وسلم من الأبوين وأبغى أن أحافظ على رسالته في احترام الدين الإسلامي وباقي الأديان
وكما قال الله تعالى في سورة البقرة " أمن الرسول بما أنزل إليه من ربه والمؤمنون كل أمن بلالله وملائكته وكتبه ورسله لا نفرق بين أحد من رسله وقالوا سمعنا وأطعنا غفرانك ربنا وغليك المصير " صدق الله العظيم

Boneta يقول...

شهرزاد
مع احترامي لرأيك
ممكن سؤال
هل لو تم تفجير اهلك لا سمح الله قدام عينيكي ووصلتي لمرحله انك مش عارفه تجمعي اعضائهم او تتعرفي عليهم هل في الحاله دي هايكون رأيك>>>لازم الواحد في المواقف دي يفكر بروية وباتزان !!
وهل مش عندك فكره عن رد فعل مصر والازهر وكل الدول العربيه وكل مسلمين العالم لما واحــــده (فرد) اتقتلت نتيجه خلاف بينها وبين واحد ؟ قلبوا الدنيا عليها ليه شيخ الازهر وقتها ما طالبش المسلمين بالتروي والعقل زي مابيطالب بيه المسيحيين دلوقتي !!دا هو نفسه كان قاعد يشجب ويدين مع انه حادث فردي ولا دم اولادنا ما يستاهلش اننا نصرخ ونشجب ونندد ونفضح الاجرام والارهاب اللي اتعرضوا له بدون اي ذنب غير انهم مسيحيين
كلام فينوس مافيهوش اي جرح لاي انسان الجرح ده في قلوبنا احنا علي اولادنا واطفالنا اللي قتلوا فرحتهم غدر وبسبب فتاوي بانهم كفار ويجب اهدار دمهم
اذا انتم فعلا قلبكم معانا فا لابد وانكم تطالبوا بمحاكمه كل شيخ طلع وقال ان الكنائس بيوت كفر وان نسائنا واموالنا حلال و ان كنائسنا فيها اسلحه وكل واحد قال علينا الانجاس وكل واحد حرض علينا من علي المنابر وكل واحد اشترك في مظاهره لسب المسيحيين والبابا باقذرالالفاظ وفي حمايه الامن الارهابي ووووووووووووووووووووووووووووووو
وقتها فعلا يبقي قلبكم معانا ونكون ايد واحده وشعب واحد لاننا محتاجين افعال مش كلام ماتضايقيش مني انا صراحتي غلسه شويتين . :(

Ms Venus يقول...

كلام تمام يا بونيتا

مجرد حلم صغنتوت يقول...

انا شايفة ان فيه حاجات غلط كتير في تربيتنا سواء مسلمين او مسيحيين في مصر
اسرائيل مسئولة عن حاجات كتير بس مش مسئولة عن تربيتنا في بيوتنا

كلنا اتأثرنا بالاحداث الاخيرة دي.. وكلنا استنكرنا اللي حصل بس اكيد محدش هيحس باللي حصل اكتر من اخواننا المسيحيين وده طبيعي
النظام محتاج حاجات كتير علشان الحفاظ على الامن.. محتاجين نغير حاجات كتير فينا..

خالص عزائي اختي فينوس
وربنا ينتقم من اللي كان وراء الحادث ده وغيره

Ms Venus يقول...

HSendbad


ردى على كلامك هو نفس رد بونيتا على شهرزاد


فى مثل مصرى بيقول


اللى ايده فى الماية مش زى اللى ايده فى نار

وقبل ما تعاتب غيرك او تنتقده


حط نفسك مكاانه


وشوف احساسك هيبقى ايه

تحية ليك نورتنى

Ms Venus يقول...

سندباد


صدقنى انا عمرى ما فقدت ولا هفقد الامل فى اخويا واختى المسلمة المصرية الحقيقية الاصيلة



جارتى وزميلتى


وده الكل شايفه ولامسه فى المظاهرات اللى بتلف مصر كلها


حتى وقت جريمة الكنيسة كان الشباب المصرى الجدع الاصيل المسلم والمسيحى واقف بيشيل الضحايا


انا كل كلامى عن المصريين اللى بالاسم بس وبايعين عقولهم للتخريب

Boneta يقول...
أزال المؤلف هذا التعليق.
فاروق سحير ( فاروق بن النيل ) يقول...

مس فينوس....................
ماتزعليش لأن الشماعة لازم تكون موجودة مع حكومة زى دى وإلا حايبرروا فشلهم إزاى كل شيئ فى بلدنا معطل ماعدا الإهمال والتسيب والفساد والرشوة
شكرا لكى ومعك بقلبى أنا وأسرتى وجميع المصريين الشرفاء من هذا الوطن

رحاب صالح يقول...

انا فاهماكي
ومع تيرز العزيزة فيما قالته
ومش هزعل من كلامك
لانك معاك حق

ابراهيم رزق يقول...

اولا عيد سعيد و ارجو ان تغطى بهجة العيد على الحزن الذى يعتصرنا جميعا

فتشى عن المصالح و بيزنس الدين و من له مصلحة فى زيادة التطرف و اشعال وقود الفتنة من الناحيتين بالفتاوى و التفاسير المغلوطة و للاسف تاكل النار او ما تاكل البسطاء و لكن ابشرهم بان من يلعب بالنار ستشتعل به النار حتما مهما علت مهارته
سعيد بمرورى للمرة الاولى
عيد سعيد و كل عام و مصر طيبة
ابراهيم رزق
ا