الأربعاء، فبراير 10، 2010

تخاريف قلم



احلامنا فيكى يا دنيا

يا ترى هتوصل لفين

بنضحك ونبكى ساعات

حاضنين الحلم بالكفين

عايزين نعيش ايامنا

من غير ما نكون خايفين

من بكرة واللى هيجرى

قوليلنا طريقنا منين
\


/


\


ليه يا دنيا معكسانا

وبعدهالك معانا ؟


بتضحكى لنا فى سطر

وسطر تانى ضحكتك مفرقانا
تعبنا نحايل فيكى

ناوية على ايه ويانا ؟

هتصفى وتصالحينا ولا

هتعملى مش سمعانا ؟

\


/


\

بس اقولك حاجة ؟
احلم ببكرة وعيش ايامك
اكيد فى يوم هتحقق احلامك

اضحك والعب وامسك الوانك
لون بيها زعلك واحزانك

وخلى ثقتك فى ربك

هى قوتك وايمانك

\


/


\


نادى بأعلى صوتك وقول انا انسان
عايش حياتى بقلب خلقه جوايا الرحمن
يوم بتلاقيه حزين ويوم تانى يكون فرحان
ما هى الدنيا كده علشان
نتعلم نحس بغيرنا ونمشى بالحسبان


\


/


\


راجع حساباتك وفكر وشوف
ولو غلطت قول انا غلطان من غير كسوف
ما هو احنا بشر جوانا قلق وخوف
ولو راح مننا احساسنا ازاى نقدر نشوف ؟


\


/


\



شوية كلام ملغبط مخرف كتبته فى يوم من الايام
جمعته وقولت ادوشكم بيه


10/02/2010

هناك 8 تعليقات:

رقة الندى يقول...

لالالا
حرام عليكى اما تسمى دى تخاريف ولا شخبطات حتى
دى بجد بينت انك استاذة فى العامى يافينوس
انا بطالب بحقى بقى:d وعيزاكى تركزى فى العامى شويه
ممكن؟؟
بجد كلهم اجمل من بعض
يسلم ابداعك ياحبى

blue-wave يقول...

احلى حاجه فى كلامك انه سهل وبسيط وجميل

حلـم،، يقول...

كلام من الواقع


باحساس انثى رائعة ناقدة


اكيد لا يدوشنا


غريبة يا رقة الندى ركزي بالعامي


حسيت ان العامي لغة ولها تصنيف؟؟


انا لاادعوكي للتركيز في اللغة سواء عامية او فصحي امر غير مفيد الاهم ان نركز بموضوع بقضية وحين تختمر في الراس والاحساس تترجم في اى لغة المهم تكون منظومة برسالة تداعب احلام الام افراح القاريء وتجد حل للامر او استفهام يجعلة يفكر في الحل

m.ezzat يقول...

حقيقي بقيت باستني الجديد عندك علشان بيشدني روعة اسلوبك ورقتة وكمان حرفيتة ودة كوم والمعاني اللي فية كوم تاني جميل اللي بتقولية لانة بيلمسني وبيلمس كل انسان وحلمة والامه وحياتة اللي كل يوم في حال والله اعلم في بكرة ايه يحصل

Ms Venus يقول...

نوجا

ربنا يخليكى يارب وميرسى لمجاملتك الرقيقة

استاذة ايه بس

ده شوية كلام ملغبط كتبته من فترة

منورانى دايما بوجودك الجميل يا جميلة

Ms Venus يقول...

احلى من الكلام انك نورتنى يا دكتور

تحية ليك

Ms Venus يقول...

حلم


جوانا ساعات كلام ولما تيجى تترجمه لحروف
يهرب منك الحرف

يعاند


يقولك لا مش هرسم احساسك

خلى احساسك جواك


تفتكر نعمل ايه وقتها ؟


منورنى دايما بوجودك الحالم

Ms Venus يقول...

مستر عزت


اشكرك على كلامك وعلى مجاملتك

بيسعدنى دايما ويشرفنى زيارتك لمدونتى المتواضعة


تحية واحترام ليك